Қазақстандағы бес проблемалық ЖЭО «сары» аймаққа өтті
10 энергоблокқа, 63 қазандыққа және 39 турбинаға күрделі жөндеу жүргізілді
Қазақстанда 2025-2026 жылғы жылыту маусымы тұрақты өтті. 2025 жылы электр станцияларындағы жөндеу жұмыстарына бөлінген қаржы көлемі алдыңғы кезеңмен салыстырғанда 6%-ға артып, 348 млрд теңгеге жетті. Ал жылу желілерін жөндеуге арналған қаржы 16%-ға өсіп, 129 млрд теңгені құрады. Бұл туралы үкімет отырысында энергетика вице-министрі Сұңғат Есімханов мәлімдеді, деп хабарлайды Kapital.kz іскерлік ақпарат орталығының тілшісі.
Электр станцияларында 10 энергоблок, 63 қазандық және 39 турбинаға күрделі жөндеу жүргізілді. Электр желілерінде 17 мың шақырым желі, 420 қосалқы станция жөнделді. Сондай-ақ 323 шақырым жылу желісі жаңғыртылып, ауыстырылды.
«Бұл электр станциялары жабдықтарының тозу деңгейін 53%-ға, электр желілерінде 66,2%-ға, ал жылу желілерінде 50%-ға дейін төмендетуге мүмкіндік берді», – деді ол.
Жылу желілеріндегі температуралық режимді сақтамау жағдайлары үш есе азайды. Электр желілеріндегі технологиялық ақаулар 12%-ға, ал электр станцияларында 15%-ға қысқарды.
«Жылыту маусымының қорытындысы бойынша ЖЭО рейтингтері жақсарды. Бес ЖЭО «қызыл» аймақтан «сары» аймаққа, ал үш ЖЭО «сарыдан» «жасыл» аймаққа өтті. Бұл бағыттағы жұмыс жалғасады», – деді энергетика вице-министрі Сұңғат Есімханов.
Өткен күзгі-қысқы кезеңде энергия көздерінің қоймаларында 5,6 млн тонна көмір және 152 мың тонна мазут жиналды. Коммуналдық-тұрмыстық сектор, әлеуметтік нысандар және халық үшін көмір дайындау жоспары 7,46 млн тонна деңгейінде белгіленді, оның ішінде 1,6 млн тоннасы коммуналдық секторға, 5,8 млн тоннасы халыққа арналған. Өткен маусымда 8,15 млн тонна көмір дайындалып, жоспар 109,8%-ға орындалды.
«Маңызды проблемалық мәселе – энергия өндіруші ұйымдардың отын бойынша кредиторлық берешегінің жоғары болуы. «ҚазТрансГаз-Аймақ» АҚ алдындағы қарыз көлемі 37,7 млрд теңгені құрайды», – деді ол.
Айта кетейік, бұған дейін Үкімет Талдықорғанда жылумен жабдықтау нысандарын аяқтауға 5,7 млрд теңге бөлген болатын. Риддер қаласындағы жылу желілері мен ЖЭО-ны жөндеуге 1,8 млрд теңге бағытталады. Қазақстандағы ЖЭО-лардың жалпы тозу деңгейі 59%-ды құрайды.
Наурыз айында көмір генерациясын дамыту жөніндегі ұлттық жоба бекітілді. Жаңа станциялар салу және қолданыстағыларды жаңғырту үшін 7,5 трлн теңге инвестиция қажет. Ұлттық құрылтайдың V отырысында Қасым-Жомарт Тоқаев Қазақстанның көмір қоры шамамен 33 млрд тонна екенін атап өтіп, көмір генерациясын дамытуға ұлттық жоба мәртебесін беруді тапсырған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
