• Басты бет
• Экономика
• Қазақстан мен Франция стратегиялық минералдар бойынша жобаларды дамытуға уағдаласты

Қазақстан мен Франция стратегиялық минералдар бойынша жобаларды дамытуға уағдаласты

Қазақстан Республикасы Еуропалық Одақ үшін аса маңызды шикізаттың 20-дан астам түрін өндіреді және жаңа инвестициялар тартуды көздейді

Қазақстан мен Франция аса маңызды шикізат материалдары бойынша жұмыс тобының алғашқы отырысын өткізді, деп хабарлады Өнеркәсіп және құрылыс министрлігінің баспасөз қызметі.

Өнеркәсіп және құрылыс министрлігі Өнеркәсіп комитеті төрағасының орынбасары Олжас Әлібеков Қазақстан Еуропалық Одақтың тиісті тізіміне енген аса маңызды шикізат материалдарының 34 түрінен 21-ін өндіріп, өңдейтінін атап өтті.

«Қазақстан мен Францияның аса маңызды шикізат материалдары саласындағы ынтымақтастығы жоғары деңгейде қол жеткізілген уағдаластықтардың жалғасы болып табылады. Ол 2023 жылғы стратегиялық минералдар бойынша ниет туралы бірлескен декларацияға, сондай-ақ Қазақстан Республикасының Президенті Қасым-Жомарт Тоқаевтың 2024 жылы Францияға жасаған мемлекеттік сапары барысында қол қойылған Жол картасына негізделеді», – делінген ведомство хабарламасында.

Жұмыс тобының отырысында Қазақстан мен Францияның мемлекеттік органдары, геологиялық қызметтері мен бизнес өкілдері геологиялық картаға түсіру, мәлімет алмасу, зертханалық зерттеу, геологиялық барлау, жер қойнауын пайдалану және заманауи тау-кен өндірісі саласын дамыту бағытындағы өзара іс-қимыл келешегін талқылады. Бұдан бөлек, титан мен басқа да стратегиялық ресурстарды жеткізу, сондай-ақ бизнес өкілдері арасындағы тікелей байланысты кеңейту мәселелері сөз болды.

Қазақстандағы инвестициялық климатты жақсарту және жер қойнауын пайдалану саласын цифрландыру бойынша атқарылып жатқан жұмыстарға ерекше мән берілді. Кездесуге қатысушылар геологиялық барлау, шикізатты өңдеу және заманауи технологияларды енгізу саласында бірлескен жобаларды жүзеге асыруға мүдделі екенін білдірді.

Бұған дейін осы жылдың төрт айында Қазақстанның Еуропалық Одақ елдерімен тауар айналымы 12,4 миллиард долларға жеткені хабарланған болатын. Бұл соманың ішінде қазақстандық экспорт үлесі 9,27 миллиард долларды құрайды.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз