• Басты бет
• Экономика
• ЖТС бойынша салықтық шегерімдерді есептеу қағидаларындағы даулы тұстар нақтыланады

ЖТС бойынша салықтық шегерімдерді есептеу қағидаларындағы даулы тұстар нақтыланады

Мемлекеттік кірістер комитеті ресми түсіндірме әзірлейді

Жаңа Салық кодексін енгізу жөніндегі Жобалық кеңсенің 20-отырысында жеке табыс салығы (ЖТС) бойынша базалық және әлеуметтік салықтық шегерімдерді қолдану мәселелері қаралды, деп хабарлайды Primeminister.kz.

Жаңа Салық кодексіндегі негізгі жаңашылдықтардың бірі – салықтық шегерімдер жүйесін жетілдіру және азаматтарға түсетін салық жүктемесін азайту. Атап айтқанда, ай сайын 30 АЕК мөлшерінде, бірақ күнтізбелік жыл ішінде 360 АЕК-тен аспайтын базалық салықтық шегерім енгізілді. Ол жеке тұлғаның салық салынатын табысын азайтып, тиісінше төленетін ЖТС сомасын төмендетеді. Сонымен қатар міндетті зейнетақы жарналары, әлеуметтік аударымдар және міндетті әлеуметтік медициналық сақтандыруға төленетін жарналар бойынша шегерімдер сақталды.

Отырыста қызметкердің табысы базалық шегерім мөлшерінен төмен болған жағдайда оны қолдану мәселесі талқыланды. Бұған дейін қолданыста болған Салық кодексі салықтық шегерімдердің пайдаланылмаған бөлігін күнтізбелік жыл шегінде келесі айларға ауыстыруға мүмкіндік беретін. Ал жаңа редакцияда мұндай норма қарастырылмаған.

«Атамекен» ұлттық кәсіпкерлер палатасының өкілдері пайдаланылмаған базалық шегерім бөлігін кейінгі айларға көшіру тетігін сақтауды ұсынды. Өз кезегінде Мемлекеттік кірістер комитетінің өкілдері жаңа норманың негізгі мақсаты – базалық салықтық шегерімді азаматтарды, әсіресе табысы төмен қызметкерлерді ай сайын қолдау құралы ретінде қолдану екенін түсіндірді. Сондықтан базалық салықтық шегерім әрбір күнтізбелік ай үшін жеке есептеледі және пайдаланылмаған соманы кейінгі салық кезеңдеріне ауыстыру көзделмейді.

Нәтижесінде Мемлекеттік кірістер комитеті базалық салықтық шегерімнің пайдаланылмаған бөлігін келесі күнтізбелік кезеңдерге көшіруге болмайтынын нақтылайтын ресми түсіндірме әзірлейтін болды.

Отырысқа қатысушылар ЖТС бойынша әлеуметтік салықтық шегерімдерді қолдану мәселелеріне де ерекше назар аударды. Салық кодексіне сәйкес I және II топтағы мүгедектігі бар адамдар үшін 5 мың АЕК, ал III топтағы мүгедектігі бар адамдарға, мүгедектігі бар балалардың ата-аналарына, асырап алушыларға, патронаттық тәрбиешілер мен қамқоршыларға 882 АЕК көлемінде әлеуметтік салықтық шегерім қарастырылған.

Қатысушылар қолданыстағы Салық кодексі жұмыс беруші ауысқан жағдайда әлеуметтік салықтық шегерімнің пайдаланылмаған бөлігін есепке алуға мүмкіндік беретінін атап өтті. Алайда бір мезгілде бірнеше жұмыс берушіде еңбек ететін жеке тұлғаларға қатысты бұл шегерімді қолдану тәртібі кодексте нақты реттелмеген.

Жиында мұндай нақты нормалардың болмауы заңды әртүрлі түсіндіру қаупін туындатып, оны теріс пайдалануға жол ашуы мүмкін екені айтылды. Осыған байланысты Қаржы министрлігі мен Мемлекеттік кірістер комитетіне салықтық жеңілдіктің әлеуметтік сипатын сақтай отырып, оны қолдану кезінде ықтимал теріс пайдаланудың алдын алатын бірыңғай тәсіл әзірлеу тапсырылды.

Бұған дейін Жаңа Салық кодексін енгізу жөніндегі Жобалық кеңесте тауарларды таңбалау жүйесін енгізу кезінде бизнесті қосымша қолдау мәселесі де қаралған болатын. Сондай-ақ ұлттық экономика бірінші вице-министрі Азамат Әмрин еңбекақы қорынан төленетін төлемдер жүйесін жеңілдету жөніндегі ұсыныстарын таныстырды. Бұдан бөлек, корпоративтік табыс салығы бойынша аванстық төлемдерді есептеу және төлеу тәртібіне өзгерістер енгізу ұсынылды.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз