Қазақстанда бизнеске арналған жаңа онлайн-сервистер іске қосылады
Ұлттық экономика министрлігі кәсіпкерлерге арналған екі жаңа цифрлық өнімді таныстырды
Қазақстанда кәсіпкерлер Міндетті талаптар тізілімі мен Мемлекеттік қолдау шараларының бірыңғай жүйесін онлайн режимде пайдалана алады. Бұл цифрлық өнімдер кәсіпкерлер үшін іске қосылады, деп хабарлайды Kapital.kz іскерлік ақпарат орталығы Ұлттық экономика министрлігінің баспасөз қызметіне сілтеме жасап.
Прототиптердің таныстырылымы «Атамекен» ҰКП алаңында өтті. Кездесудің негізгі мақсаты – жүйелер ресми түрде іске қосылғанға дейін интерфейстерді кәсіпкерлермен бірге сынақтан өткізіп, олардың нақты сұраныстарына сәйкес функционалды жетілдіру.
Алғашқы цифрлық өнім – Кәсіпкердің бірыңғай жеке кабинетіне интеграцияланған Міндетті талаптар тізілімі. Қазір кәсіпкерлік қызметке қойылатын талаптар көптеген нормативтік құқықтық актілерде қамтылғандықтан, оларды тәжірибеде қолдану қиындық туғызады. Жаңа сервис бұл талаптарды бірыңғай цифрлық жүйеге біріктіріп, кәсіпкер таңдаған қызмет түріне қарай міндетті талаптардың жеке тізімін қалыптастырады.
Чек-парақты алу үшін пайдаланушыға қызмет саласын таңдап, бірнеше нақтылаушы сұраққа жауап беру жеткілікті. Осыдан кейін жүйе автоматты түрде қажетті талаптардың тізімін және рұқсат құжаттарын алу үшін мемлекеттік сервистерге тікелей сілтемелерді қалыптастырады.
Қазіргі уақытта тізілімге экономиканың түрлі салаларын қамтитын шамамен 106 мың міндетті талап енгізілген. Цифрлық сүзгілеу тетігі артық талаптарды алып тастап, кәсіпкерлерге тек өз қызметіне қатысты нормаларды ғана ұсынуға мүмкіндік береді.
Тізілім сондай-ақ бизнеске түсетін әкімшілік жүктемені бағалауға мүмкіндік береді. Арнайы есептеу тетігі әрбір міндетті талапты орындауға қанша уақыт пен қаржы қажет екенін анықтайды. Бұл кәсіпкерлік қызметті реттеу жүйесін жетілдіруге арналған қосымша құрал болмақ.
Таныстырылған екінші сервис – Мемлекеттік қолдау шараларының бірыңғай жүйесі. Ол субсидиялау, жеңілдетілген несиелеу, кепілдік беру және гранттар бойынша қолданыстағы барлық бағдарламалар туралы ақпаратты біріктіреді. Кәсіпкерлер өзіне қолайлы қолдау құралдарын таңдап, өтінімді бірыңғай цифрлық сервис арқылы бере алады.
Бизнес өкілдері бастаманы қолдап, сервистерді жетілдіруге қатысты ұсыныстарын білдірді. Атап айтқанда, заңнамадағы өзгерістер туралы проактивті хабарламаларды енгізу және пайдаланушыларға қолайлылықты арттыру үшін жасанды интеллект технологияларын пайдалану ұсынылды.
«Біз болашақ пайдаланушылардың пікірін ескеру үшін бизнес қауымдастығына прототиптер дайын болған кезеңде арнайы келдік. Кәсіпкерлердің заңнамадағы өзгерістер туралы "ақылды" хабарламаларды енгізу жөніндегі ұсынысы өте орынды. Барлық ұсыныстар жан-жақты талданып, жүйелерді өнеркәсіптік пайдалануға енгізер алдында ескеріледі», – деді Ұлттық экономика вице-министрі Бекболат Молдабеков.
Бұған дейін Қаржы министрлігі «Кәсіпкердің бірыңғай жеке кабинеті» (КБЖК) порталында «Жеке кәсіпкердің қызметін тоқтату» атты жаңа сервисті және жауапкершілігі шектеулі серіктестікті жеңілдетілген тәртіппен таратуға арналған электрондық қызметті іске қосқан болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
