СҚО-дағы жылу магистралінің құрылысына 650 млн теңге бөлінеді
Жоба Петропавлдағы тозу деңгейі 80%-дан асқан магистральды ауыстырып, 30 мыңнан астам тұрғынды тұрақты жылумен қамтамасыз етуге мүмкіндік береді
Солтүстік Қазақстан облысының Петропавл қаласында жылу магистралінің құрылысын аяқтауға Үкімет резервінен шамамен 650 млн теңге бөлінді. Бұл туралы қаулыға премьер-министр Олжас Бектенов қол қойды, деп хабарлайды primeminister.kz.
Қаражат Ж. Жабаев – А. Шәшімбаев – Новая – Ы. Алтынсарин көшелері бойындағы учаскелерде жылу желісін салуға бағытталады.
2026 жылы ұзындығы 1,4 шақырым болатын ескі жылу желілері демонтаждалып, олардың орнына жаңасы тартылады. Ал 2025 жылы 0,7 шақырым жылу желісі қайта жаңғыртылған болатын. Осылайша бөлінген қаражаттың арқасында Петропавлдағы ұзындығы 2 шақырымнан асатын №2 жылу магистралін жөндеу жұмыстары толық аяқталады.
Жобаны іске асыру тозу деңгейі 80%-дан асқан магистральды жаңартуға, қаладағы 30 мыңнан астам тұрғынды, яғни 200-ге жуық көпқабатты тұрғын үй мен әлеуметтік нысанды сенімді жылумен қамтамасыз етуге, сондай-ақ жылу желілерінің тозу деңгейін төмендетуге мүмкіндік береді.
Энергетика министрлігінің мәліметінше, 2025 жылдан бері Қазақстандағы электр станцияларында 10 энергия блогына, 63 қазандыққа және 39 турбинаға күрделі жөндеу жүргізілді. Сонымен қатар 17 мың шақырым электр беру желісі жаңартылып, 420 қосалқы станса жаңғыртылды және ең көп тозған 323 шақырым жылу желісі ауыстырылды. Соның нәтижесінде электр стансалары жабдықтарының тозу деңгейі 53%-ға, ал жылу желілерінің тозуы 50%-ға дейін төмендеді.
Бұған дейін Үкімет резервінен Ақмола облысындағы Степногорск пен Көкшетау қалаларындағы инженерлік желілер мен жылу көздерінің тозуын азайтуға 3,9 млрд теңгеден астам қаржы бөлінген болатын. Сондай-ақ Талдықорғандағы жылумен жабдықтау нысандарының құрылысын аяқтауға 5,7 млрд теңге бөлінді. Риддердегі жылу желілері мен ЖЭО-ны жөндеуге 1,8 млрд теңге бағытталды. Ал Теміртауда 2028 жылдың соңына дейін 200 шақырымнан астам жылу желісін жаңарту жоспарланып отыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
