«Жасыл даму» орман өрттерінен қорғауды күшейтуге 16,9 млрд теңге бөлді
Экология министрлігінде қаражат өңірлер арасында қалай бөлінетіні түсіндірілді
«Жасыл даму» АҚ орман қоры, мемлекеттік табиғи аумақтар мен ұлттық парктерді өрттен қорғауды күшейтуге кәдеге жарату төлемінен түскен 16,9 млрд теңгеден астам қаражат бөлді, деп хабарлайды Kapital.kz іскерлік ақпарат орталығы экология және табиғи ресурстар министрлігінің баспасөз қызметіне сілтеме жасап.
«Мемлекет басшысының «Таза Қазақстан» экологиялық бастамасы аясында және ҚР экология және табиғи ресурстар министрлігінің қолдауымен «Жасыл даму» АҚ орман қорын, мемлекеттік табиғи аумақтар мен ұлттық парктерді өрттен қорғауды күшейтуге кәдеге жарату төлемінен түскен қаражатты бағыттады. Қаржыландырудың жалпы көлемі 16 916 552 707 теңгені құрады», – делінген хабарламада.
Министрліктің мәліметінше, бұл қаражат орман өрттерін ерте анықтайтын заманауи жүйелерді енгізуге, дрондар сатып алуға, бейнебақылау, байланыс және деректерді беру жабдықтарын жаңартуға, сондай-ақ қажетті инфрақұрылымды дамытуға жұмсалады. Мұндай жүйелер бағдарламалық және техникалық шешімдерді біріктіріп, қорғалатын аумақтарды тәулік бойы бақылауға және өрт белгілері анықталған жағдайда ақпаратты жедел жеткізуге мүмкіндік береді.
«Бұл жобаның Қазақстан үшін маңызы ерекше. Себебі елімізде орман алқаптары аумақтың салыстырмалы түрде аз бөлігін алып жатыр. Оларды қалпына келтіруге ондаған жыл қажет. Сондықтан өртті дер кезінде анықтау және жедел әрекет ету табиғи байлықты сақтаудың негізгі шарттарының бірі болып саналады», – деп атап өтті министрлік.
Жоба аясында өңірлерге СРО-1 өртті ерте анықтау жүйесінің 14 кешені берілді.
Қаржыландыру мынадай өңірлер арасында бөлінді:
• Ақмола облысы – 4 838 441 450 теңге;
• Қостанай облысы – 1 354 086 800 теңге;
• Қарағанды облысы – 3 043 492 747 теңге;
• Павлодар облысы – 1 045 995 589 теңге;
• Алматы облысы – 3 337 277 304 теңге;
• Түркістан облысы – 1 661 830 639 теңге;
• Шығыс Қазақстан облысы – 1 635 428 178 теңге.
СРО-1 – қорғалатын аумақтағы өрттің алғашқы белгілерін автоматты түрде анықтайтын бағдарламалық-аппараттық кешен. Жүйе тәулік бойы жұмыс істеп, түтінді, жану өнімдерін, температураның көтерілуін, сондай-ақ жалынның инфрақызыл немесе ультракүлгін сәулеленуін тіркейді. Қауіп расталған жағдайда ақпарат диспетчерлік пунктке немесе өртке қарсы қызметке жедел жолданады. Бұл әрекет ету уақытын қысқартып, өрттің таралуының алдын алуға мүмкіндік береді.
Кейбір нысандарда тәулік бойы жұмыс істейтін шолу бұрышы кең автоматтандырылған бейнекамералар қолданылады. Мұндай технологиялар өртті оның көзге анық байқалмай тұрып-ақ, бастапқы кезеңінде анықтауға мүмкіндік береді.
Бұған дейін Қазақстандағы ұлттық табиғи парктерді өртті ерте анықтау жүйелерімен жабдықтау жоспарланып отырғаны хабарланған еді.
2024 жылы «Жасыл даму» орман және су шаруашылығындағы техниканы жаңартуға, сондай-ақ төтенше жағдайлар жүйесіне 200 млрд теңге бөлген.
Жыл басынан бері Қазақстанның орман алқаптарында жалпы аумағы 794 гектардан асатын 36 өрт тіркелді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
