Алматы жастары қаланы дамыту жобаларына 5 млн теңгеге дейін грант ала алады
Оңтүстік астанада «Жастардың қатысу бюджеті» бағдарламасы іске қосылады
Алматыда «Жастардың қатысу бюджеті» атты жаңа жобаға өтінім қабылдау басталады. Қазақстанда алғаш рет жас тұрғындар қаланы дамытуға арналған өз бастамаларын ұсынып, оларды іске асыру үшін мемлекеттік қаржыландыру ала алады. Бұл туралы аталған бастаманы жүзеге асырып жатқан Алматы қаласының Жастар саясаты басқармасы хабарлады, деп жазады Kapital.kz іскерлік ақпарат орталығы қала әкімдігінің баспасөз қызметіне сілтеме жасап.
Жобаның басты мақсаты – алматылық жастарға идея ұсынып қана қоймай, оны өздері жүзеге асыруға мүмкіндік беру.
«Жастардың қатысу бюджеті» мемлекет пен жастар арасындағы өзара іс-қимылдың жаңа тетігіне айналады. Ол әрбір белсенді алматылыққа өз идеясын нақты қалалық жобаға айналдыруға мүмкіндік береді. Қоғамдық кеңістіктерді абаттандыру мен экологиялық бастамалардан бастап цифрлық сервистерге, білім беру бағдарламаларына және мәдени іс-шараларға дейінгі түрлі бағыттарда енді қаланы одан әрі заманауи, жайлы әрі тартымды етуге бағытталған шешімдерді жастардың өзі ұсына алады», – деді Жастар саясаты басқармасының басшысы Азиз Кажденбек.
Бағдарламаға Алматы қаласында тұратын 18 бен 35 жас аралығындағы Қазақстан азаматтары қатыса алады. Өтінімді жеке немесе бастамашыл топ, жастар ұйымы не қоғамдық бірлестік құрамында беруге болады.
Өтінімдер jasalmaty.kz порталы арқылы электронды форматта қабылданады. Қатысушылар тіркеліп, өтінімді толтырып, жоба сипаттамасын, шығындар сметасын, күнтізбелік жоспарды, презентацияны және басқа да қажетті құжаттарды қоса ұсынуы тиіс.
Байқауға қалалық ортаны абаттандыру, инфрақұрылымды дамыту, экология, мәдениет, спорт, білім беру, цифрлық технологиялар, жастар кәсіпкерлігі, туризм, медиа, инклюзия, психология және денсаулық сақтау, сондай-ақ өзге де әлеуметтік маңызы бар жобалар бойынша бастамалар қабылданады.
Іріктеу бірнеше кезеңнен тұрады. Алдымен құжаттар техникалық тексерістен өтеді, кейін оларды Жастар саясаты басқармасының өкілдері, мәслихат депутаттары, Қоғамдық кеңес мүшелері, ғылыми және сарапшылық қауымдастық өкілдері кіретін конкурстық комиссия қарайды.
Іріктеудің негізгі кезеңдерінің бірі – ашық онлайн дауыс беру. Сараптамалық іріктеуден өткен жобалар арнайы платформада жарияланып, Қазақстан тұрғындары өздеріне ұнаған бастамаларды электрондық цифрлық қолтаңба немесе SMS арқылы растау көмегімен қолдай алады. Әрбір пайдаланушы ең көп дегенде үш жобаға дауыс бере алады.
Бір жобаға көрсетілетін қолдау көлемі 500 мыңнан 5 млн теңгеге дейін болады. Бағдарламаның жалпы бюджеті – 90 млн теңге. Оның аясында 12-ден 60-қа дейін жастар бастамасын қолдау жоспарланған. Әр жобаны іске асыру мерзімі бір айдан үш айға дейін созылады.
Жоба қорытындысы бойынша ондаған бастаманы жүзеге асыру, Алматының 500-ден астам жас тұрғынын тарту, жастардың азаматтық белсенділігін арттыру және қаланың дамуына үлес қосуға дайын жас көшбасшылардың жаңа буынын қалыптастыру көзделіп отыр.
Еске салайық, бұған дейін 2026 жылы халықтың әлеуметтік осал топтарына бизнес-идеяларды іске асыру үшін 9 мың грант беру жоспарланып отырғаны хабарланған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
