Nvidia табысын енді тек чип сатудан ғана емес, ЖИ сервистерінен де табады
Компания бұлтты қызмет провайдерлерімен кірісті бөлісу туралы келісімге келді, алғашқы жобалар АҚШ пен Индонезияда іске қосылып жатыр
Америкалық Nvidia Corp. бұлтты қызмет провайдерлерімен бірлесіп ауқымды жасанды интеллект (ЖИ) фабрикаларын іске қосады және жабдық сатудан түсетін табыстан бөлек, олардың кірісінің бір бөлігін алып отырады, деп хабарлайды Интерфакс-Қазақстан.
Жаңа бизнес-модель компанияға өз технологиялары негізінде көрсетілетін бұлтты қызметтерді пайдалану көлеміне байланысты тұрақты табыс әкеледі. Сонымен қатар жасанды интеллект саласындағы стартаптар қымбат есептеу инфрақұрылымын өз қаражатына салмай-ақ, оған қол жеткізу мүмкіндігіне ие болады.
Осы жоба аясында Nvidia-ның алғашқы серіктестерінің қатарында Sharon AI және Firmus бар. Sharon AI компаниясы Nvidia-ның ең жаңа 40 мыңға дейінгі чипін енгізуді жоспарлап отыр. Ал Firmus Индонезияда жасанды интеллект кампусын салып жатыр. Компания онда 170 мыңға дейінгі чипті іске қосып, нысанның электр тұтыну қуатын 360 МВт-қа дейін жеткізуді көздейді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
