Биыл 36 мың адам табиғи газға қол жеткізеді
Қазақстанда халықтың көгілдір отынға қолжетімділігін 80%-ға жеткізу жөніндегі жол картасы әзірленуде
Энергетика министрлігі халықты табиғи газбен қамту деңгейін 80%-ға дейін жеткізуге арналған жол картасын әзірлеп жатыр, деп хабарлайды Kapital.kz іскерлік ақпарат орталығы ведомствоның баспасөз қызметіне сілтеме жасап.
Министрліктің мәліметінше, Қазақстанды газдандыру жұмыстары 2035 жылға дейінгі Бас схема аясында жүзеге асырылып келеді.
2025 жылдың қорытындысы бойынша газбен жабдықтау бағытындағы 84 жобаның іске асырылуы нәтижесінде 94 елді мекеннің 354 мыңнан астам тұрғыны табиғи газға қол жеткізді. Бір жыл ішінде 2 мың шақырым газ тарату желісі салынды. Соның нәтижесінде Қазақстандағы 20,5 млн тұрғынның 13,1 миллионы табиғи газға қосылды.
Ал 2026 жылы газ тасымалдау инфрақұрылымын дамыту жобаларының арқасында тағы 36 мың адам табиғи газға қол жеткізеді.
Әзірленіп жатқан жол картасы елді газдандыруды жеделдету бағытындағы негізгі стратегиялық құжатқа айналады. Құжатты іске асыру халықтың табиғи газға қолжетімділігін едәуір кеңейтіп, мемлекет басшысы қойған мақсатқа қол жеткізуге, азаматтардың өмір сүру сапасын арттыруға және өңірлердің орнықты әлеуметтік-экономикалық дамуына қосымша жағдай жасауға мүмкіндік береді.
Еске салайық, бұған дейін Қазақстанда 2026 жылғы 1 шілдеден бастап тауарлық газдың көтерме бағасын орта есеппен 33%-ға арттыру жоспарланып отырғаны хабарланған болатын. Сонымен қатар Энергетика министрлігі халық үшін тарифтердің өсуі тежелетінін және күрт қымбаттау болмайтынын мәлімдеген еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
