Қазақстан тұрақты даму рейтингінде үш сатыға көтерілді
Ел Sustainable Development Report 2026 рейтингінде 169 мемлекеттің ішінде 67-орынға тұрақтады
Қазақстан Тұрақты даму мақсаттарына (ТДМ) қол жеткізу индексіндегі көрсеткішін жақсартты. Sustainable Development Report 2026 есебінде республика 169 елдің ішінде 67-орынға ие болып, былтырғы көрсеткішпен салыстырғанда үш сатыға көтерілді, деп хабарлайды Kapital.kz іскерлік ақпарат орталығы Ұлттық экономика министрлігінің баспасөз қызметіне сілтеме жасап.
Салыстырмалы түрде алғанда, 2025 жылы Қазақстан 167 елдің арасында 70-орында болған.
2026 жылғы рейтингте Қазақстан G20 құрамындағы Индонезия, Мексика, Түркия, Үндістан және Сауд Арабиясы сияқты бірқатар елдерді басып озды.
«Ең маңызды жетістіктердің бірі – ТДМ-ның 6-мақсаты – «Таза су және санитария» бағыты бойынша ілгерілеу. Халықтың ауызсумен жабдықтаудың базалық қызметтеріне қолжетімділігі 95,4%-дан 97,8%-ға дейін артты. Сонымен қатар тұщы су алу көлемі азайып, өндірісі тапшы су ресурстарын пайдалануды қажет ететін импорттық тауарлардың құрамындағы су көлемі қысқарды. Сондай-ақ әлеуметтік саланы дамыту, инфрақұрылымды жаңғырту, инновациялық қызметті ынталандыру және халықтың әл-ауқатын арттыру бағыттары бойынша тұрақты оң динамика байқалады», – деп атап өтті министрлікте.
Қазақстан сондай-ақ ТДМ-ны мемлекеттік саясатқа ықпалдастыру мәселелері бойынша SDSN сараптамалық сауалнамасына енгізілген Орталық Азиядағы жалғыз мемлекет болды.
Еске салсақ, бұған дейін Қазақстанның ІТ-нарығы Dealroom нұсқасы бойынша ең қарқынды дамып келе жатқан экожүйелердің ондығына енгені хабарланған болатын. Сондай-ақ ел Government AI Readiness Index 2025 рейтингінде 195 мемлекеттің ішінде 60-орынға жайғасып, әлемнің 40 ірі экономикасының қатарына кірді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
