Ұлттық банк алғашқы криптоайырбастау пунктіне лицензия берді
Алғашқы лицензияны Pax Finance компаниясы алды
Қазақстанда цифрлық активтер нарығын реттеудің жаңа кезеңі басталды. Ұлттық банк криптоайырбастау пунктінің қызметіне алғашқы лицензияны берді. Оның иегері Pax Finance ЖШС болды, деп хабарлайды Kapital.kz іскерлік ақпарат орталығы Ұлттық банктің баспасөз қызметіне сілтеме жасап.
Лицензия компанияға криптовалюталарды ресми түрде сатып алу, сату және сақтау қызметін көрсетуге, бөлімшелер ашуға және криптоматтар орнатуға мүмкіндік береді. Сондай-ақ қызмет Қазақстан заңнамасы аясында жүзеге асырылады.
Осылайша, Қазақстанда цифрлық активтер нарығына қатысушыларды лицензиялау жүйесі іске қосылды. Лицензия алу немесе есептік тіркеуден өту үшін Ұлттық банкке жүгінуге болады.
Еске салсақ, 2026 жылдың сәуірінде Қазақстанда цифрлық активтерді пайдалана отырып алғашқы транзакция жасалды. Ал 2026 жылғы 1 мамырдан бастап цифрлық активтер туралы заңға енгізілген түзетулер күшіне енді. Олар криптовалюта нарығын «көлеңкелі аймақтан» шығарып, реттелетін инфрақұрылым қалыптастыруға бағытталған.
Нарыққа қатысушылар лицензия алған сайын криптовалюталарды сатып алу, сату және сақтау бойынша негізгі сервистер кезең-кезеңімен қолжетімді болады. Ал цифрлық қаржы активтерін кеңінен қолдану және жаңа қаржылық сервистерді енгізу инфрақұрылымның дамуына қарай жүзеге асырылады. Сонымен қатар цифрлық активтер нарығының жұмысын қамтамасыз ететін қызмет көрсетушілер институты енгізіледі.
Айта кетейік, 2025 жылы Қазақстанда заңсыз жұмыс істеген 130 криптоайырбастау пунктінің қызметі тоқтатылған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
