Ислам даму банкі Қазақстанда төрт жаңа су қоймасының құрылысына қаржы бөледі
Жоба аясында жеті су қоймасы жаңғыртылып, 2,8 мың шақырым суару арналары жөнделеді
Қазақстанда жүзеге асырылып жатқан жобалардың барысын Су ресурстары және ирригация министрі Нұржан Нұржігітов Ислам даму банкінің президенті Мұхаммад Сүлейман Әл-Жассермен талқылады. Тараптар сондай-ақ алдағы ынтымақтастық перспективаларына назар аударды, деп хабарлайды Kapital.kz іскерлік ақпарат орталығы министрліктің баспасөз қызметіне сілтеме жасап.
Атап айтқанда, Ислам даму банкімен бірлесіп іске асырылып жатқан «Климатқа төзімді су ресурстарын дамыту» жобасының бірінші кезеңінің жүзеге асырылу барысы қаралды. Бүгінде барлық ұйымдастыру шаралары аяқталып, халықаралық консультанттар анықталды. Суару арналарының реконструкциясына қатысты 88 жоба бойынша құрылыс-монтаж жұмыстары басталды. Сонымен қатар су қоймаларын салу және жаңғырту жұмыстарын жүргізетін мердігер ұйымдарды анықтау рәсімдері жалғасып жатыр.
Жалпы Ислам даму банкімен жасалған келісім аясында төрт жаңа су қоймасын салу, қолданыстағы жеті су қоймасын реконструкциялау, сондай-ақ жалпы ұзындығы 2,8 мың шақырымды құрайтын суару арналары бойынша 151 реконструкциялау және күрделі жөндеу жобасын іске асыру жоспарланған.
«Министрлік пен Ислам даму банкі арасындағы тығыз әрі өзара тиімді ынтымақтастықтың арқасында біз қысқа мерзімде ауқымды жұмыстарды атқардық. Мемлекет басшысы мен үкімет жүктеген барлық міндеттерді бірлескен күш-жігермен толық жүзеге асыратынымызға сенімдімін», – деді Қазақстанның Су ресурстары және ирригация министрі Нұржан Нұржігітов.
Өз кезегінде Мұхаммад Сүлейман Әл-Жассер бірлескен жобалардың табысты жүзеге асатынына сенім білдіріп, Қазақстанның су шаруашылығы инфрақұрылымын дамытуға бағытталған бастамалары Ислам даму банкінің өзге серіктестері үшін үлгі бола алатынын атап өтті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
