Vietjet Алматыдан Прага мен Ханойға тікелей рейстер ашады
Ұшу бағыттары 2026 жылдың қазанынан бастап аптасына екі рет орындалады
Лоукостер Vietjet Air 2026 жылдың қазан айынан бастап Алматыдан Ханой мен Прагаға тікелей рейстерді іске қосатынын ресми түрде жариялады. Жаңа бағыттар Қазақстанды Вьетнам және Чехиямен байланыстырып қана қоймай, 20 елдегі 186-дан астам бағытқа ыңғайлы транзиттік мүмкіндіктер ашады, деп хабарлайды Kapital.kz іскерлік ақпарат орталығының тілшісі әуе компаниясының баспасөз қызметіне сілтеме жасап.
Рейстер 2026 жылғы 10 қазаннан бастап Airbus A330 ұшақтарымен аптасына екі рет – сейсенбі және сенбі күндері орындалады.
Ұшу кестесі:
- Алматы – Ханой: Алматы халықаралық әуежайынан 08:10 (жергілікті уақыт) ұшу, Ханойға 16:20 (жергілікті уақыт) сол күні келу;
- Ханой – Алматы: 08:25-те ұшу, Алматыға 12:50-де (жергілікті уақыт) сол күні келу;
- Алматы – Прага: Алматы халықаралық әуежайынан 14:20 (жергілікті уақыт) ұшу, Прагаға 18:55 (жергілікті уақыт) сол күні келу;
- Прага – Алматы: 20:30-да ұшу, Алматыға келесі күні 07:10-да (жергілікті уақыт) келу.
«Алматыдан жаңа рейстердің іске қосылуы біздің Вьетнам мен Еуропаны Қазақстанмен байланыстыру миссиямыздағы стратегиялық қадам болып табылады. Заманауи A330 ұшақтарын пайдалана отырып, біз осы қарқынды дамып келе жатқан нарықтар арасында көпір орнатып, саяхатты қолжетімді әрі ыңғайлы етеміз. Жаңа бағыттар Қазақстан, Вьетнам және Чехия арасындағы туризмді, іскерлік ынтымақтастықты және мәдени алмасуды айтарлықтай нығайтады деп сенеміз», – деді Vietjet бас директоры Нгуен Тхань Шон.
Айта кетейік, бұған дейін Vietjet әуе компаниясының Алматы – Ханой және Алматы – Прага жаңа бағыттарын ашатынын Азаматтық авиация комитеті хабарлаған болатын. Сондай-ақ Астана – Ханой бағытында тікелей әуе қатынасын ашу және Алматы – Хошимин рейсін қайта қалпына келтіру ұсынылған.
Еске салсақ, 2025 жылғы 6 мамырда Vietjet Air және Qazaq Air стратегиялық әріптестік туралы келісімге қол қойып, Qazaq Air базасында Vietjet Qazaqstan әуе компаниясын құрған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
