- Басты бет
- Технологиялар
- Екібастұздағы «Деректер орталықтары алқабы»: толық құрылыс кезеңі 2026 жылғы маусымда басталады
Екібастұздағы «Деректер орталықтары алқабы»: толық құрылыс кезеңі 2026 жылғы маусымда басталады
Павлодар облысындағы ауқымды цифрлық жобаға халықаралық компаниялар тартылып, AI-экожүйе дамытылады
Премьер-министр Олжас Бектенов Павлодар облысындағы «Деректер орталықтары алқабы» жобасының қазіргі жағдайы бойынша кеңес өткізді, деп хабарлайды Primeminister.kz.
Жоба мемлекет басшысы Қасым-Жомарт Тоқаевтың Ұлттық құрылтайдың V отырысында және Жасанды интеллектті дамыту жөніндегі кеңестің екінші отырысында берген тапсырмаларын орындау аясында жүзеге асырылуда.
Атқарылып жатқан жұмыстар туралы премьер-министрдің орынбасары – жасанды интеллект және цифрлық даму министрі Жаслан Мәдиев, «Қазақтелеком» АҚ басқарма төрағасы Бағдат Мусин баяндады. Сондай-ақ Павлодар облысының әкімі Асайын Байханов инфрақұрылым дайындығы жөнінде ақпарат берді.
Екібастұз қаласындағы алаңда геодезиялық жұмыстар аяқталып, инженерлік-геологиялық зерттеулер жүргізілуде және болашақ модульдік блоктарға арналған шұңқырлар қазу жұмыстары басталған. Құрылыс техникасы мен мамандар толық жұмылдырылған. Толық құрылыс циклі 2026 жылғы маусымда басталады.
Кеңес барысында электр энергетикасы, деректерді сақтау және өңдеу, ақпараттық қауіпсіздік бағыттары бойынша халықаралық тәжірибе мен технологиялық серіктестер талаптары ескерілді. Министрлік тарапынан жобаға әлемдік технологиялық көшбасшылар, гиперскейлерлер және жасанды интеллект пен бұлтты есептеу саласындағы ірі халықаралық компаниялар қатарынан әлеуетті қатысушылар пулы қалыптастырылған.
Жоба аясында alem.ai халықаралық орталығы базасында жергілікті AI-экожүйені дамыту, зерттеу бастамалары, кадр даярлау және стартаптарды қолдау бағдарламалары көзделген.
Кеңес қорытындысы бойынша Олжас Бектенов жауапты мемлекеттік органдар мен даму институттарына барлық бағыт бойынша жұмыстар қарқынын арттыруды тапсырды. Жобаны іске асыру нәтижелері бір ай ішінде Премьер-министрге ұсынылуы тиіс.
Айта кетейік, Екібастұзда «Деректер орталықтары алқабы» пилоттық жобасы жүзеге асырылады. Жобаға шамамен 30 млрд доллар инвестиция тарту жоспарланған.
Сондай-ақ жобаға қатысты «Қазақтелеком», ҚР жасанды интеллект және цифрлық даму министрлігі және Aleria компаниясы арасында үшжақты меморандумға қол қойылған. Presight AI басшысы да жобаға қатысуға қызығушылық білдірген.
Бұдан бөлек, Екібастұзда жаңа әуежай салу мүмкіндігі қарастырылуда. Бұл өңірдің көлік қолжетімділігі мен инвестициялық тартымдылығын арттыруға бағытталған.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
