Алатау АЭА-да толық циклді биофармацевтикалық кешен салу көзделуде
Жобаға 32,5 млрд теңге жеке инвестиция салынады, кәсіпорында онкологиялық және сирек кездесетін ауруларға арналған препараттар шығарылады
Үкімет Алматы облысында құны 32,5 млрд теңге болатын фармацевтикалық зауыт салу жобасын мақұлдады, деп хабарлайды премьер-министрдің баспасөз қызметі.
Елімізде мемлекет басшысының тапсырмасына сәйкес отандық дәрі-дәрмек өндірісінің үлесін арттыруға бағытталған жобалар жүзеге асырылып жатыр. Осы жұмыс аясында ҚР денсаулық сақтау министрлігі мен «Steppe pharmaceuticals» ЖШС арасында Алматы облысындағы «Алатау» АЭА аумағында толық циклді биофармацевтикалық кешен салу жөніндегі инвестициялық келісім мақұлданды. Тиісті қаулыға премьер-министр Олжас Бектенов қол қойды. Жеке инвестициялардың жалпы көлемі 32,5 млрд теңгені құрайды.
Жаңа өндіріс жоғары технологиялық өндірістік қуаттарды жергіліктендіру мен дамытуға бағытталған. Фармзауыт 20 түрлі дәрілік зат шығаруды жоспарлап отыр. Олардың қатарында онкологиялық және сирек кездесетін ауруларды емдеуге арналған препараттар, сондай-ақ заманауи иммунобиологиялық құралдар бар.
Кәсіпорынды іске қосу 2031 жылға жоспарланған, жобалық қуатқа 2032 жылы шығу көзделсе, негізгі бағыттар бойынша толық циклге көшу 2034 жылға жоспарланған.
Дәрілік заттарды шығару және сертификаттаудан бөлек, жоба аясында ғылыми-зерттеу және тәжірибелік-конструкторлық жұмыстар, биоэквиваленттілік зерттеулерін жүргізу, тіркеу дерекнамасын әзірлеу және GMP халықаралық стандарттарын енгізуді қамтитын жеке R&D бағытын дамыту қарастырылған.
Сонымен қатар кешен базасында қазақстандық мамандарды оқыту және біліктілігін арттыру жүйесі құрылады. Жобаны жүзеге асыру елдің дәрілік қауіпсіздігін нығайтып, Алматы облысында заманауи фармацевтикалық өндірістік инфрақұрылым қалыптастыруға мүмкіндік береді. Нәтижесінде шамамен 60 жаңа жұмыс орны ашылады.
Жалпы, бүгінде елде фармацевтика саласында 8 ірі инвестициялық жоба жүзеге асырылып жатыр. Сала оң динамика көрсетуде. Өткен жылдың қорытындысы бойынша отандық фармацевтикалық өнім өндірісінің көлемі 191,1 млрд теңгеге жетіп, 2024 жылмен салыстырғанда 8,7%-ға өсті. Салаға тартылған инвестициялардың жалпы көлемі 390 млрд теңгеден асты. Алматы облысындағы кешен құрылысы импортқа тәуелділікті төмендетіп, қазақстандықтарды сапалы әрі өмірлік маңызы бар дәрі-дәрмекпен қамтамасыз етуге мүмкіндік беретін тағы бір якорлық жобаға айналады.
Бұған дейін Қарағанды облысында құны 42,5 млрд теңге болатын фармацевтикалық зауыт салынатыны хабарланған еді.
Сондай-ақ АлтИНФАРМ, МСП-РОМФАРМ, Абди Ибрагим Глобал фарм және Нобел Алматинская фармацевтическая фабрика фармацевтикалық өндірістерді жергіліктендіретіні айтылған.
Семейде қытайлық серіктестердің қатысуымен фармацевтикалық зауыт салу жоспарланып отыр.
Қазақстандық фармацевтикалық өнімдердің ішкі нарықтағы үлесі 40%-ды құрайды. Елде дәрі-дәрмек пен медициналық бұйым өндіретін 209 отандық кәсіпорын тіркелген.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
