• Басты бет
• Жылжымайтын мүлік
• Көпқабатты үйлерді басқару қағидаларына өзгерістер енгізілді

Көпқабатты үйлерді басқару қағидаларына өзгерістер енгізілді

Атырауда ПИК-терді қайта тіркеу шілдеге дейін аяқталуы тиіс

Қазақстанда көпқабатты тұрғын үйлерді басқарудың жаңартылған қағидалары күшіне енді – жүйе енді ашық әрі тұрғындардың мүддесіне көбірек бағытталмақ. Бұл өзгерістер Атырау қаласына да тікелей қатысты, деп хабарлайды Kapital.kz іскерлік ақпарат орталығы Атырау облысы әкімдігінің баспасөз қызметі сілтеме жасап.

Қазіргі таңда Атырауда 1 253 көпқабатты тұрғын үй бар. Осыған байланысты үйлерді басқару мәселесі өзекті күйінде қалып отыр. Негізгі жаңашылдықтардың бірі – «жай серіктестік» нысанының жойылуы.

Енді тұрғын үйлерді басқарудың екі ғана нұсқасы қарастырылған: мүлік иелері бірлестігі немесе тікелей бірлескен басқару. Пәтер иелері кооперативтері (ПИК) сақталады, алайда олар басқару нысаны ретінде емес, тұрғындармен келісімшарт негізінде жұмыс істейтін басқарушы компаниялар ретінде қызмет етеді.

Сонымен қатар, қараусыз қалған үйлерге ерекше назар аударылған. Мұндай нысандар үшін уақытша басқарушыны тағайындау мерзімі қысқартылды. Бұл тұрғын үйлердің жағдайының нашарлауына жол бермеуге бағытталған.

Атырау қалалық тұрғын үй-коммуналдық шаруашылығы және тұрғын үй инспекциясы бөлімінің бас маманы Гүлмира Нигметованың айтуынша, өзгерістер төлем жүйесіне де қатысты.

«Екі міндетті жарна енгізілді: ағымдағы және жинақтау жарнасы. Біріншісі үйді күнделікті күтіп ұстауға — тазалау, жарықтандыру, ұсақ жөндеу және инженерлік желілерге қызмет көрсетуге бағытталады. Екіншісі күрделі шығындарға арналған қор ретінде қалыптастырылады. Бұл ретте соңғы тарифті енді тұрғындардың өздері бекітеді. Ол үшін меншік иелерінің кемінде 70%-ының келісімі қажет. Тариф мөлшері тек тұрғындардың жалпы жиналысында айқындалады. Қазір ПИК-терді қайта тіркеу жүргізіліп жатыр. Оны шілде айына дейін аяқтау қажет. Әйтпесе мұндай ұйымдар сот тәртібімен таратылатын болады», – деді Гүлмира Нигметова.

Реформаның басты мақсаты – тұрғындардың өз үйлерін басқаруға нақты бақылау орнатуына мүмкіндік беру. Қазіргі таңда Атыраудағы 793 көпқабатты үйге ПИК қызмет көрсетсе, 460 үй «қараусыз қалған» санатына жатады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз