Қазақстанда энергия жинақтайтын «алып пауэрбанктер» салынады
Еліміздің энергия жүйесіне TotalEnergies, Masdar сынды компаниялар қатысып жатыр
Энергетика министрлігі жанындағы Қоғамдық кеңесте Қазақстанда алып энергия жинақтау жүйелері мен Алматы облысында ГАЭС салу жобалары талқыланды, деп хабарлайды Kapital.kz іскерлік ақпарат орталығы ведомствоның баспасөз қызметіне сілтеме жасап.
Отырыста 2025–2026 жылдардағы жылыту маусымының өтуі, сондай-ақ энергетика саласына жасанды интеллект пен цифрлық технологияларды енгізу мәселелері қаралды.
Сонымен қатар энергия жинақтау жүйелері нарығын дамыту және гидроаккумуляциялық электр станцияларын енгізу перспективалары талқыланды. Қазақстанда жаңартылатын энергия көздерінің белсенді дамуына байланысты энергия жинақтау жүйелері жобалары іске асырылуда.
Бүгінде «Жасыл» энергетика саласына TotalEnergies, Masdar, China Power және China Energy секілді ірі халықаралық инвесторлар тартылған. Аталған компаниялар қуаттылығы әрқайсысы 1 ГВт-қа дейін жететін жел электр парктерін салып жатыр. Әрбір жел паркі жанынан қуаты 300 МВт болатын энергия жинақтау жүйелерін салу да көзделген. Бүгінде іске асырылып жатқан жобалардың жиынтық көлемі 1,6 ГВт-ты құрайды.
Сондай-ақ Қазақстанда энергожүйенің маневрлік мүмкіндігін арттыруға бағытталған гидроаккумуляциялық электр станцияларын салу көзделген.
Қазіргі таңда Алматы облысында екі ГАЭС жобасы пысықталуда. ГАЭС «энергетикалық аккумулятор» қағидатымен жұмыс істейді: электр энергиясы артық өндірілген кезеңде су жоғарғы су қоймасына айдалады, ал тұтыну шарықтаған уақытта төменге жіберіліп, турбиналар арқылы электр энергиясы өндіріледі.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
