• Басты бет
• Экономика
• Қазақстанда аграршыларға арналған дизель отынына бояу және цифрлық бақылау жүйесі енгізілді

Қазақстанда аграршыларға арналған дизель отынына бояу және цифрлық бақылау жүйесі енгізілді

Жанармайды мақсатсыз пайдалану көлемі 21%-ға азайды

Дизель отынын бөлуді бақылауды күшейту шаралары жанармайды мақсатсыз пайдалану жағдайларын 21%-ға төмендетті, деп хабарлайды Kapital.kz іскерлік ақпарат орталығы энергетика министрлігінің баспасөз қызметіне сілтеме жасап.

«Ауыл шаруашылығы тауарын өндірушілерге арналған дизель отынының бөлінуі мен қозғалысын ашық бақылауды қамтамасыз ету үшін бұған дейін бірқатар қосымша шара енгізілді. Атап айтқанда, жеке ПИН-кодтар белгіленіп, отынды сары, көк және қызыл түске бояу жүйесі енгізілді, сондай-ақ электронды шот-фактуралар жүйесінде дизель отынына арналған жеке виртуалды қойма құрылды.

Қабылданған шаралар дизель отынын мақсатсыз пайдалану көлемін азайтуға мүмкіндік берді. Мәселен, нақты іріктеу көлемі 729 мың тоннадан 602 мың тоннаға дейін қысқарып, 21%-ға төмендеді», – делінген хабарламада.

Жеткізілімдер бекітілген кестеге сәйкес жүзеге асырылып, ведомствоның тұрақты бақылауында тұр.

Жыл басында энергетика және ауыл шаруашылығы министрліктері егіс науқанын жүргізу үшін 402 мың тонна дизель отынын жеткізу кестесін бекітті. Жеткізілімдер биылғы 1 ақпан мен 30 маусым аралығында жүзеге асырылады.

Дизель отынының ұсынылатын бағасы ҚҚС-ты қоса алғанда, өңірлердегі межелі станцияға дейін литріне 263 теңгені құрайды. Соңғы құнды өңірлік операторлар белгілейді және ол литріне 281 теңгеге дейін жетуі мүмкін. Бұл орташа бөлшек сауда бағасынан 49 теңгеге немесе 15%-ға төмен.

Егіс жұмыстарына арналған ерте қаржыландыруға 1870 аграрий қол жеткізді. Барлығы 2429 ауыл шаруашылығы тауарын өндірушіден пул қалыптастырылды. Ауыл шаруашылығы министрлігі әкімдіктермен бірлесіп егіс алқаптарының құрылымын жасақтады. Жалпы егіс көлемі 23,8 млн гектарды құрап, өткен жылмен салыстырғанда 180 мың гектарға артты.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз