Қазақстанда шегірткеге қарсы 480 мың гектарға жуық алқап өңделді
Жұмыстар 12 өңірде жүргізіліп жатыр
Қазақстанда үйірлі шегіртке түрлеріне қарсы химиялық өңдеу жұмыстары 480 мың гектар аумақта жүргізілді, деп хабарлайды Kapital.kz іскерлік ақпарат орталығы ауыл шаруашылығы министрлігінің баспасөз қызметіне сілтеме жасап.
Аграрлық ведомствоның мәліметінше, қорғаныс шаралары 12 өңірде арнайы жерүсті техникасын, ұшқышсыз ұшу аппараттарын және авиацияны тарту арқылы жүзеге асырылып жатыр. Ең ауқымды өңдеу жұмыстары Түркістан облысында (291,2 мың га), Жамбыл облысында (116 мың га), Ақтөбе облысында (35,6 мың га), Жетісу облысында (17,3 мың га) жүргізілген.
Қалған өңірлерде, АШМ мәліметінше, Агроөнеркәсіптік кешендегі мемлекеттік инспекция комитетінің аумақтық инспекциялары «Республикалық фитосанитариялық диагностика және болжамдар әдістемелік орталығы» РММ-мен бірлесіп, зиянкестердің таралу ошақтарын дер кезінде анықтау үшін ауыл шаруашылығы алқаптарына мониторинг пен тексеру жұмыстарын жалғастырып жатыр.
«Барлық өңір қорғаныс шараларын толық көлемде жүргізуге қажетті пестицидтермен және арнайы техникамен қамтамасыз етілген. Шекара маңындағы аумақтарда шегірткенің көшуіне жол бермеу мақсатында министрлік көрші мемлекеттердің бейінді ведомстволарымен жедел ақпарат алмасуды тұрақты түрде жүргізіп келеді. Шегіртке зиянкестерінің таралу жағдайы мен қорғаныс өңдеулерінің барысы ҚР АШМ-ның ерекше бақылауында», – делінген министрлік хабарламасында.
Бұған дейін биыл шегірткеге қарсы химиялық өңдеу көлемін қысқарту жоспарланып отырғаны хабарланған болатын. Бұл мониторинг дәлдігінің артуы және зиянкестер ошақтарын жедел жою есебінен мүмкін болғаны айтылды.
2025 жылдың желтоқсанында БҰҰ-ның Азық-түлік және ауыл шаруашылығы ұйымы Қазақстанға шегірткеге мониторинг жүргізу және онымен күресуге арналған жабдықтарды тапсырған еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
