Жасанды интеллектке құйылған инвестиция қарқыны күрт бәсеңдеуі мүмкін
BIS сарапшылары мұның жаһандық қаржы жүйесінің тұрақтылығына қауіп төндіруі ықтимал екенін ескертті
Жасанды интеллект саласындағы қазіргі инвестициялық бум бұрын экономикалық құлдыраумен аяқталған ірі технологиялық инвестициялық толқындарға ұқсайды. Бұл туралы Интерфакс-Қазақстан агенттігі Bank for International Settlements (BIS) ұйымының жыл сайынғы экономикалық есебіне сілтеме жасап хабарлады.
BIS мәліметінше, 1830 жылдардағы каналдар құрылысы, 1840 жылдардағы Ұлыбританиядағы теміржол құрылысы, 1920 жылдардың соңындағы электрлендіру және 1990 жылдардың соңындағы доткомдар бумы сияқты технологиялық серпілістердің барлығына ортақ белгі болған. Олар үлкен үміт арттырғанымен, коммерциялық тұрғыдан салынған шамадан тыс инвестицияларды ақтай алмады.
«Бұл кезеңдердің барлығы инвестициялардың күрт қысқаруымен аяқталып, тұтас экономикаларда рецессияға алып келді. Жасанды интеллектке салынып жатқан инвестициялардың ауқымы мен қарқыны, сондай-ақ еңбек өнімділігінің айтарлықтай өсетініне қатысты күтілімдер осы тарихи мысалдарды еске салады. Бұл қысқа мерзімді кезеңде төмендеу тәуекелдерінің бар екенін көрсетеді», – делінген есепте.
The Wall Street Journal басылымының келтірген мәліметінше, BIS бас менеджері Пабло Эрнандес де Кос компаниялардың нарықтағы үлес үшін бәсекесі жасанды интеллектке де шамадан тыс инвестиция салуға алып келген болуы мүмкін екенін айтты.
«Бұл жағдай ЖИ технологиялары күткендей тиімді болмаса, саланы әлдеқайда осал етіп, қазіргі инвестициялық бумның күрт тоқтауына себеп болуы мүмкін», – деді ол.
Банк болжамынша, 2025–2026 жылдары бұлтты қызметтердің бес ірі провайдерінің (гиперскейлерлердің) жасанды интеллектке байланысты капиталдық шығындары 1 трлн доллардан асады.
BIS гиперскейлерлер, жасанды интеллект зертханалары және құрылыс мердігерлері тартатын қарыз көлемінің ұлғаюы жаһандық қаржы жүйесінің, әсіресе тұрақты табысты қаржы құралдары нарығының тұрақтылығына қауіп төндіруі мүмкін екенін ескертті.
«Егер гиперскейлерлер агрессивті капиталдық инвестицияларын қысқартса немесе тоқтатса, жеткізу тізбегіндегі көптеген қарыз алушылар жоғалтқан кірісті алмастыру және қарыздарын өтеу тұрғысынан қиындықтарға тап болуы мүмкін», – деп қорытындылады BIS.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
