Әлемде құны 1 млрд доллардан асатын стартаптар саны артты
Ең қымбат стартаптар қатарында Anthropic, OpenAI және ByteDance көш бастап тұр
2025 жылы әлемде нарықтық құны 1 млрд доллардан асатын және биржада саудаланбайтын «бір мүйізді» (unicorn) стартаптар саны 5,3%-ға өсіп, 1 603 компанияға жетті. Бұл туралы Интерфакс-Қазақстан агенттігі Hurun Research Institute деректеріне сілтеме жасап хабарлады.
Олардың жиынтық құны бір жылда 43%-ға өсіп, 54 трлн юаньды (7,9 трлн доллар) құрады. Қазіргі таңда мұндай компаниялар әлемнің 53 елінде орналасқан.
Global Unicorn Index 2026 рейтингіне сәйкес, «бір мүйізді» стартаптар саны бойынша АҚШ көш бастап тұр. 2026 жылғы 1 қаңтардағы жағдай бойынша елде мұндай 806 компания тіркелген. Бұл өткен жылмен салыстырғанда 48 компанияға көп.
Екінші орында – Қытай. Бұл елде 381 «бір мүйізді» стартап бар, яғни бір жыл ішінде олардың саны 38-ге артқан. Үшінші орынға 70 стартаппен Ұлыбритания көтеріліп, 61 стартапы бар Үндістанды басып озды.
Әлемдегі ең қымбат «бір мүйізді» стартаптар қатарында америкалық Anthropic пен OpenAI тұр. Олардың нарықтық құны тиісінше 965 млрд доллар және 852 млрд доллар деп бағаланады.
Үшінші орында – ByteDance технологиялық компаниясы. TikTok пен оның қытайлық Douyin платформасының бас компаниясының құны 480 млрд долларға бағаланған.
Ал алғашқы ондыққа құны 159 млрд доллар болатын Stripe финтех-стартапы, жасанды интеллект негізіндегі бағдарламалық қамтамасыз ету әзірлеушісі Databricks (134 млрд доллар), Alipay төлем сервисінің иесі Ant Group (87 млрд доллар), цифрлық банк Revolut (75 млрд доллар), Binance криптовалюта биржасы (70 млрд доллар), азиялық онлайн киім ритейлері Shein (67 млрд доллар) және ұшқышсыз ұшу аппараттарын қоса алғанда жаңа қару түрлерін әзірлейтін Anduril (61 млрд доллар) енді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
