Samsung Electronics пен SK Hynix чип шығаратын жаңа зауыттар салады
Жобаның жалпы құны 518 млрд долларға бағаланып отыр
Оңтүстік Корея президенті Ли Чжэ Мен елде жартылай өткізгіш компоненттер өндірісін дамыту және ауқымды инвестициялар есебінен жасанды интеллект инфрақұрылымын кеңейту жоспарын жариялады. Бұл туралы Интерфакс-Қазақстан хабарлайды.
Үкіметтің мәліметінше, Samsung Electronics пен SK Hynix елдің оңтүстік-батысында чип шығаратын екі зауыттан салады. Бұл ұлттық жартылай өткізгіштер экожүйесін қалыптастыру жобасының бір бөлігі. Жобаның жалпы құны 800 трлн вонды (518 млрд доллар) құрайды. Президенттің айтуынша, өңірлік билік бұл жобаларға 5-тен 20 трлн вонға дейін инвестиция салады.
Samsung және SK Group Сеул маңында чиптерді қаптау (packaging) кластерін құруға 81 трлн вон бағыттайды.
Сонымен қатар SK Group деректер орталықтарының құрылысына 1 трлн вон, ал жартылай өткізгіш өндірісін дамытуға 1,1 трлн вон инвестициялауды жоспарлап отыр. Компания бұл инвестициялардың нақты мерзімін әзірге жариялаған жоқ.
Бұдан бөлек, SK Group, GS Group және Naver Corp. алдағы жылдары жалпы қуаты 8,4 ГВт болатын деректер орталықтарын салуға 550 трлн вон инвестиция құяды. Бұл жоба ел билігінің жариялаған жоспары аясында жүзеге асады.
Оңтүстік Корея 2035 жылға қарай деректер орталықтарының жалпы қуатын 18,4 ГВт-қа дейін ұлғайтуды көздеп отыр. Сондай-ақ алдағы 15 жыл ішінде жаңа буындағы жады чиптерін өндіру қуатын кеңейтуге 19,4 млрд доллар инвестициялау жоспарланған.
Дүйсенбі күні Сеул қор биржасындағы сауда қорытындысы бойынша Samsung Electronics акцияларының құны 4,8%-ға, SK Hynix акциялары 1,7%-ға төмендеді. Ал Naver Corp. акциялары 3,9%-ға қымбаттады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
