Meta компаниясы қызметкерлерінің 20%-дан астамын қысқартуы мүмкін – БАҚ
Бұл қашан жүзеге асатыны әзірге белгісіз
Meta компаниясы қызметкерлерін ауқымды қысқартуды жоспарлап отыр, деп жазады Reuters агенттігі дереккөздерге сілтеме жасап. Бұл туралы Интерфакс-Қазақстан хабарлайды.
Дереккөздердің айтуынша, қысқарту компания қызметкерлерінің 20%-дан астамын қамтуы мүмкін, алайда оның нақты қашан жүзеге асатыны әлі анықталмаған.
Олардың мәліметінше, компанияның топ-менеджерлері жуырда басқа жоғары басшылық өкілдеріне осындай жоспарлар туралы хабар беріп, қысқартуға дайындық жұмыстарын бастауды тапсырған.
Meta компаниясының ресми өкілі Энди Стоун қызметкерлерді қысқарту жоспарына қатысты сұрақтарға жауап бере отырып, бұл тек теориялық болжамдарға негізделген алып-қашпа ақпарат екенін айтты.
Еске салайық, 2022 жылдың қарашасында компания 11 мың қызметкерін (сол кездегі штаттың шамамен 13%-ы) қысқартқан болатын. Ал төрт айдан кейін тағы 10 мың адамды жұмыстан босататынын жариялаған.
2025 жылдың соңындағы мәлімет бойынша, компанияда шамамен 79 мың адам жұмыс істеген.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
