- Басты бет
- Тағайындаулар
- Бауыржан Байбек Qazaq Kaolin директорлар кеңесі басшылығына келді
Бауыржан Байбек Qazaq Kaolin директорлар кеңесі басшылығына келді
Компанияның тең құрылтайшысы – оның әкесі Қадырғали Байбек
Алматының бұрынғы әкімі Бауыржан Байбек Qazaq Kaolin директорлар кеңесінің төрағасы болып тағайындалды, деп хабарлайды Kapital.kz іскерлік ақпарат орталығы компанияның корпоративтік сайтына сілтеме жасап.
Айта кетейік, ұйымның тең иелерінің бірі – экс-шаһар басшысының әкесі Қадырғали Байбек. Электрондық үкімет деректеріне сәйкес, компания құрылтайшыларының бірі ретінде Бекзат Керімбай да тіркелген.
«Qazaq Kaolin» ЖШС Ақмола облысында орналасқан Алексеев кен орнындағы каолиндерді өндіру және өткізу бойынша ұзақ мерзімді келісімшартқа ие. Компания 2014 жылдан бері минералдық шикізатты өндіру және өңдеу нарығында жұмыс істейді.
Өткен сәуір айында Алексеев кен орны базасында каолинді байытуға арналған кен-байыту комбинатының іске қосылғаны хабарланған болатын. Кәсіпорынның өндірістік қуаты жылына 230 мың тонна шикізатты және 90 мың тоннаға дейін байытылған каолинді құрайды. Сонымен қатар жоба аясында төрт фракциялы кварц құмын шығару да көзделген.
Еске салайық, 2019 жылдың маусым айында президент Қасым-Жомарт Тоқаев Бауыржан Байбекті Алматы әкімі қызметінен босатқан болатын. Ол қала әкімдігін төрт жыл басқарды.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
