Байланыс операторлары күмәнді төлемдерді бұғаттай бастайды
Қазақстанда заңсыз ойын бизнесіне қаржы ағынын тоқтатудың жаңа тетігі енгізіледі
Қаржылық мониторинг агенттігі мен ұялы байланыс операторларымзаңсыз ойын бизнесінде қолданылатын қаржы ағындарының жолын кесуге келісті, деп хабарлайды Kapital.kz іскерлік ақпарат орталығы.
Агенттіктің хабарлауынша, жиында онлайн-казиноға төлем жүргізу тетіктері көрнекі түрде таныстырылды. Атап айтқанда, абоненттердің ұялы байланыс теңгерімі арқылы қаражатты есептен шығару тәсілдері көрсетілді. Бұл арнаның азаматтарды заңсыз әрекеттерге тартуда белсенді пайдаланылып отырғаны атап өтілді.
Анықталған деректерді растау мақсатында Агенттік тарапынан бақылау іс-шаралары жүргізілді.
«Ағымдағы жылдың 7 сәуірінде онлайн-казино белгілері бар 10 интернет-ресурста барлық ұялы байланыс операторларының сервистерін пайдалана отырып бақылау сатып алулары жасалды. Нәтижесінде мобильді теңгерім арқылы төлем жасау мүмкіндігі бар екені анықталып, мұндай қаржы арналарының нақты жұмыс істеп тұрғаны расталды», делінген ақпаратта.
ҚМА байланыс операторларына бірқатар нақты тапсырмалар берді. Оның ішінде күмәнді төлемдерді анықтау және бұғаттау тетіктерін енгізу, заңсыз ойын қызметінің белгілері бар интернет-ресурстарға тұрақты мониторинг жүргізу, сондай-ақ заңсыз ойын платформаларына бағытталған қаржылық операцияларға шектеу қою.
Сонымен қатар, кірістерді жылыстатуға және терроризмді қаржыландыруға қарсы іс-қимыл саласындағы Қазақстан Республикасы заңнамасының талаптарын сақтау мәселесіне ерекше назар аударылды.
Кездесу қорытындысы бойынша тәуекелдерді басқарудың қолданыстағы жүйелерін қайта қарау, сондай-ақ Агенттік пен байланыс операторлары арасындағы ақпарат алмасудың бірыңғай тәсілін қалыптастыру туралы уағдаластықтарға қол жеткізілді.
Агенттік бұл шаралар заңсыз ойын бизнесінің қаржылық арналарына тосқауыл қоюға және азаматтарды құқыққа қайшы схемаларға тартудан қорғауға бағытталғанын атап өтті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
