• Басты бет
• Государство
• Қазақстан жаңа виза енгізуде

Қазақстан жаңа виза енгізуде

«Алтын виза» бірнеше жеңілдіктер береді

Қазақстанда «Алтын виза» енгізілуде. Виза жеке табыс салығын, мүлік және жер салығын төлеуден босату, табыстар мен мүлікті жалпыға бірдей декларациялаудан босату, Қазақстан Республикасының азаматтарымен тең дәрежеде мемлекеттік және қаржылық қызметтерге қол жеткізу секілді бірнеше жеңілдіктерді қарастырады. Бұл туралы ҚР Президентінің «Жоғары білікті мамандарды, шетелдік инвесторлар мен кәсіпкерлерді тарту үшін қолайлы жағдайлар жасау мақсатында көші-қон саясатын жетілдіру шаралары туралы» жарлығында айтылған.

Премьер-министрдің орынбасары – мәдениет және ақпарат министрі Аида Балаева президент жарлығын іске асыру аясында көші-қон саясатына қатысты жаңа тәсілдерді түсіндірді.

«Үкімет әкімшілік бақылаудан инвестициялар үшін ашық әрі икемді орта қалыптастыруға және жоғары білікті кадрларды тартуға бағытталған сервистік модельге көшуде», – деді Аида Балаева.

Оның айтуынша, «Алтын виза», тапшы және жоғары технологиялық салалар үшін біліктіліктерді тануды жеңілдету және «бір терезе» қағидаты бойынша процестерді толық цифрландыру секілді бірқатар құрал енгізілуде.

«Қарапайым тілмен айтқанда, біз күрделі, көбіне шектеуші жүйеден неғұрлым ашық әрі икемді модельге көшіп жатырмыз. Негізгі мақсат – отандық экономикаға қажет мамандар үшін ашық, болжамды және қолайлы көші-қон жүйесін қалыптастыру, оларға Қазақстанға еркін кіру, кәсіби тұрғыда тиімді іске асу және ел өміріне толыққанды, жайлы интеграциялану мүмкіндігін қамтамасыз ету», – деп түсіндірді Аида Балаева.

Сондай-ақ кәсіби біліктіліктерді тану рәсімдері жеңілдетіледі, бұл әсіресе тапшы және жоғары технологиялық салалар үшін өзекті.

Бұған дейін Қасым-Жомарт Тоқаев Қазақстандағы әлеуметтік және иммиграциялық саясатқа қатысты тәсілдерді жаңарту қажеттігін атап өткен болатын. Оның айтуынша, технологиялық серпіліске тек сапалы адами капитал болған жағдайда ғана қол жеткізуге болады. Бұл міндет мемлекеттің іс-қызметінің іс жүзінде барлық саласына, соның ішінде әлеуметтік саясат пен иммиграцияны реттеуге жаңа тәсілдер әзірлеуді талап етеді, деп санайды Қасым-Жомарт Тоқаев.

«Тағы да қайталап айтамын: технологиялық дамуда нақты ілгерілеуге қол жеткізу үшін сапалы адами капиталды қалыптастыру және дамыту мәселесімен тығыз айналысу қажет, бұл проблеманы елемеуге болмайды. Бұл, өз кезегінде, әлеуметтік саясатқа, соның ішінде иммиграциялық мәселелерге қатысты тәсілдерді қайта қарауды және жаңа тәсілдер әзірлеуді талап етеді. Әлем түбегейлі өзгерді, бұл процесс одан әрі күшейе түседі. Бізге, бүкіл Қазақстанға да өзгеретін уақыт келді. Әйтпесе өте қиын болады», – деді президент.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз