Грузия үкіметі 6 жылдан асқан автокөліктерді әкелуге тыйым салу жоспарын өзгертті

Грузия үкіметі 6 жылдан асқан жеңіл автокөліктерді елге әкелуге тыйым салу шешімінен бас тартты, деп хабарлайды Интерфакс-Қазақстан. Алайда мұндай көліктерді әкелген кезде жоғарылатылған кедендік алым енгізіледі.

Бұл туралы Грузияның премьер-министрі Ираклий Кобахидзе мәлімдеді.

«Импортқа тыйым салудың орнына 6 жылдан асқан көліктер үшін 4,5 лари мөлшерінде кедендік алым енгізіледі», – деді Ираклий Кобахидзе үкіметтің бейсенбідегі отырысында.

Қазіргі уақытта Грузияда жеңіл автокөліктерді әкелу үшін стандартты кедендік алым 1 куб. см қозғалтқыш көлеміне 0,8 лари құрайды.

«Біз бұл шешімге кейбір түзетулер енгіздік. Ол жеке кәсіпорындар мен азаматтар мүддесіне негізделген және қоғамда кең талқыланды», – деді Ираклий Кобахидзе.

12 ақпанда ол 1 сәуірден бастап Грузияға 6 жылдан асқан жеңіл автокөліктерді әкелуге тыйым салынатынын хабарлаған еді.

«Соңғы жылдары Грузиядағы автокөліктер саны күрт көбейіп кетті. 2012 жылы елде 864 мың автокөлік тіркелсе, биыл бұл көрсеткіш 2 миллионнан асты. Көліктер санының өсуі бір жағынан кептелістерге, екінші жағынан экологиялық жағдайдың нашарлауына әкеледі. Сондықтан экология мен халықтың денсаулығын қорғау, халықтың қозғалысын жеңілдету үшін маңызды шаралар қабылдау қажет», – деп түсіндірді Ираклий Кобахидзе.

Үкіметтің бұл шешімі Грузияның ақпарат құралдарында кең талқыланды. Импорттаушылардың айтуынша, бұл елдегі автонарық көлемін екі есеге қысқартуы мүмкін.

Естеріңізге сала кетейік, жеңіл автокөліктердің импорты мен экспорты Грузияның сыртқы сауда құрылымында бірінші орында тұр. 2025 жылы елге жеңіл автокөліктердің импорты 3,87 млрд АҚШ доллары болды (2024 жылға қарағанда 11,5% өсім), бұл жалпы импорт көлемінің 20,9%-ын құрайды. Ал реэкспорт көлемі 16% өсіп, 2,8 млрд АҚШ долларына жетті, бұл Грузия экспортындағы 38%-дан астамын қамтиды.

Негізгі импорт елдері – АҚШ, Жапония және Германия, ал 2025 жылы негізгі реэкспорт бағыттары – Қырғызстан, Қазақстан және Әзербайжан.