Hugo Boss 2025 жылы таза пайдасын 16%-ға арттырды

Германияның Hugo Boss AG киім және аксессуарлар өндірушісі 2025 жылы таза пайдасын 16%-ға арттырды, алайда түсімі 0,9%-ға төмендеді, деп хабарлайды Интерфакс-Қазақстан компанияның есептілігіне сілтеме жасап.

Таза пайда 2024 жылғы 223,594 млн еуромен салыстырғанда 259,285 млн еуроны құрады. Түсім 4,31 млрд еуродан 4,27 млрд еуроға дейін азайды.

Сатылымның органикалық өсімі 2% болды. Оның ішінде Солтүстік және Оңтүстік Америкада – 3%, EMEA өңірінде 2% өсім тіркелді. Ал Азия-Тынық мұхиты өңірінде көрсеткіш 5%-ға төмендеді.

Пайыздар мен салықтарды шегергенге дейінгі пайда (EBIT) 8,3%-ға өсіп, 390,75 млн еуроны құрады. Компания ұсынған консенсус-болжамға сәйкес, сарапшылар бұл көрсеткішті 379 млн еуро деңгейінде күткен еді.

Былтыр жалпы маржа 2024 жылғы 61,7%-дан 61,5%-ға дейін төмендеді.

Hugo Boss 2025 жылға арналған дивиденд мөлшерін бір акцияға 0,04 еуро деңгейінде белгіледі. Бір жыл бұрын бұл көрсеткіш 1,4 еуро болған.

Сондай-ақ компания 2027 жылдың соңына дейін жүзеге асырылатын 200 млн еуроға дейінгі көлемде өз акцияларын кері сатып алу бағдарламасын жариялады.

2026 жылы Hugo Boss EBIT көрсеткішін 300–350 млн еуро деңгейінде күтеді. Сонымен қатар сатылымның органикалық көлемі 5-9%-ға төмендеуі мүмкін деп болжанып отыр.

Сейсенбі күнгі сауда барысында Hugo Boss акцияларының бағасы 3,6%-ға өсті. Соңғы 12 айда компанияның нарықтық құны 7,4%-ға төмендеп, 2,4 млрд еуроны құрады. Ал осы кезеңде DAX қор индексі шамамен осындай мөлшерде өсті.