Парсы шығанағы елдері Иран соққыларына жауап беру құқығын сақтайды

Катар, Сауд Арабиясы, Біріккен Араб Әмірліктері, Кувейт, Оман және Бахрейн сыртқы істер министрлері қашықтан форматта Парсы шығанағы араб мемлекеттерінің ынтымақтастық кеңесі отырысын өткізіп, Иранның соққыларына жауап беру құқығын сақтайтындарын мәлімдеді, деп жазады Интерфакс-Қазақстан.

«Парсы шығанағы елдері өздерінің қауіпсіздігі мен тұрақтылығын, сондай-ақ аумақтарын, азаматтары мен тұрақты тұрғындарын қорғау үшін барлық қажетті шараларды қабылдайды, оның ішінде агрессияға жауап беру мүмкіндігі де бар», – делінген отырыс қорытындысы бойынша жарияланған мәлімдемеде.

Сыртқы ведомство басшылары өз елдерінің халықаралық заңдарға сәйкес «жауап беру және өзін-өзі қорғау жөніндегі заңды құқықтарын» сақтайтынын атап өтті.

Олар сондай-ақ Иранды «шабуылдарды дереу тоқтатуға» шақырды.

Министрлер Парсы шығанағы өңіріндегі тұрақтылық тек «аймақтық мәселе ғана емес, сонымен қатар жаһандық экономикалық тұрақтылықтың іргелі негізі» екенін атап өтті.

Мәлімдемеде Иранның шабуылдарын Араб мемлекеттері лигасына мүше мемлекеттер де айыптағаны айтылған.

Олардың пікірінше, Иранның әрекеттері «халықаралық заңдар мен конвенцияларды, сондай-ақ халықаралық құқық қағидаттарын өрескел бұзу болып табылады».