Coca-Cola британдық Costa Coffee желісін сату жоспарынан бас тартты

Coca-Cola Co. британдық Costa Coffee кофеханалар желісін сату жоспарынан бас тартты, себебі әлеуетті сатып алушылардың ұсыныстары компанияның күткен деңгейіне сәйкес келмеді, деп жазады Financial Times. Басылым дереккөздерінің айтуынша, Coca-Cola желтоқсан айында Costa активін сатып алуға ниетті соңғы үміткерлермен келіссөздерді тоқтатқан, деп хабарлайды Интерфакс-Казахстан.

Келіссөздердің соңғы кезеңіне қатысқан инвесторлардың арасында TDR Capital (Asda супермаркеттер желісінің иесі), сондай-ақ PizzaExpress пен Gail наубайханалар желісіне иелік ететін Bain Capital мамандандырылған қоры болды.

Бұған дейін FT хабарлағандай, Coca-Cola компаниясы Costa үшін шамамен 2 млрд фунт стерлинг (2,7 млрд доллар) алғысы келген. Бұл америкалық компанияның 2018 жылы аталған желіні Whitbread-тен сатып алу үшін төлеген 3,9 млрд фунт сомасынан екі есеге жуық аз.

Соңғы жылдары Costa премиум санаттағы тәуелсіз кофеханалар тарапынан да, төмен баға ұсынатын Greggs сияқты желілер тарапынан да күшейген бәсекелестікке тап болды. Кофеханалар желісінің 2024 жылғы операциялық шығыны екі еседен астам артып, 1,2 млрд фунт түсім кезінде 13,5 млн фунтқа жетті. Costa-ны сату процесінің тоқтауы Coca-Cola-ны активтер құнын есептен шығаруға мәжбүрлеуі мүмкін, деп атап өтеді FT.

Costa Coffee 2023 жылы (соңғы қолжетімді есептілік) 1,2 млрд фунт түсіммен 13,8 млн фунт көлемінде таза шығын тіркеген болатын.