• Басты бет
• Технологиялар
• Қазақстанда мамандандырылған ХҚКО-лардан дайын құжаттарды жеткізудің жаңа сервисі іске қосылды

Қазақстанда мамандандырылған ХҚКО-лардан дайын құжаттарды жеткізудің жаңа сервисі іске қосылды

Мемлекеттік корпорация жаңа қызметті қалай пайдалануға болатынын түсіндірді

Енді қызмет алушыларға дайын жүргізуші куәлігін, техникалық паспортты немесе автокөліктің мемлекеттік нөмірін алу үшін мамандандырылған халыққа қызмет көрсету орталықтарына қайта барудың қажеті жоқ. Мемлекеттік корпорация дайын құжаттарды жеткізудің жаңа сервисін енгізді, деп хабарлайды Kapital.kz іскерлік ақпарат орталығы мемлекеттік корпорацияның баспасөз қызметіне сілтеме жасап.

Жеткізуді рәсімдеу небәрі бірнеше минутты алады. Құжат немесе мемлекеттік тіркеу нөмірі белгісі дайын болғаннан кейін бұл мүмкіндікті пайдалануға болады. Бұл ретте қызмет тек тапсырыс берілген елді мекен аумағында ғана көрсетіледі. Сағат 17:00-ге дейін жасалған тапсырыстар сол күні, ал 17:00-ден кейін мақұлданғандары келесі жұмыс күні жеткізіледі.

«Бүгінгі таңда азаматтар үшін уақытты үнемдеу мен мобильділік ерекше маңызды. Сондықтан біз қызметтерді барынша ыңғайлы, артық барыс-келіссіз алуға мүмкіндік беретін сервистерді дамытып жатырмыз. Дайын құжаттарды жеткізу қызметінің іске қосылуы — цифрлық экожүйені дамытудағы кезекті маңызды қадам. Бұл азаматтардың күнделікті істерінен қол үзбей, уақытын тиімді жоспарлауына жол ашады», — деп атап өтті Мемлекеттік корпорацияның басқарма төрағасы Арман Кенжеғалиев.

Жеткізуге қалай тапсырыс беруге болады?

1. «ХҚКО» мобильді қосымшасына кіріп, «Мамандандырылған ХҚКО» бөліміндегі «Дайын құжаттарды жеткізу» батырмасын басыңыз;

2. Мекенжайды көрсетіп, жеткізудің ыңғайлы уақытын белгілеңіз;

3. Оферта шартымен танысып, тапсырысты растаңыз және ақысын төлеңіз.

Осыдан кейін қосымша арқылы жеткізу барысын бақылап, курьердің мәліметтерін нақты уақыт режимінде көруге болады.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз