• Басты бет
• Мемлекет
• Қазақстанда мемлекетке миллиардтаған теңге шығын келтірген компания басшысына іздеу жарияланды

Қазақстанда мемлекетке миллиардтаған теңге шығын келтірген компания басшысына іздеу жарияланды

Қаржылық мониторинг агенттігі әлеуметтік нысандар құрылысынан 1,2 млрд теңге жымқыру ісі туралы хабарлады

«Восток Инжиниринг» ЖШС басшысына іздеу жарияланды. Тергеу мәліметінше, Шығыс Қазақстан және Абай облыстарындағы жеті маңызды нысанның құрылысы тиісті деңгейде қадағаланбағандықтан, мемлекетке 1,2 млрд теңгеден астам шығын келген. Бұл туралы Қаржылық мониторинг агенттігінің баспасөз қызметіне сілтеме жасап Kapital.kz іскерлік ақпарат орталығының тілшісі хабарлайды.

«Қаржылық мониторинг агенттігінің Шығыс Қазақстан облысы бойынша департаменті 2020-2023 жылдар аралығында ШҚО мен Абай облысы аумағындағы әлеуметтік маңызы бар жеті нысанның құрылысына техникалық қадағалау жүргізген «Восток Инжиниринг» ЖШС басшысына қатысты тергеу амалдарын жүргізіп жатыр. Компания дене шынықтыру-сауықтыру кешендері, сумен жабдықтау және жағалауды бекіту құрылыстарының салынуы барысында құрылыс-монтаждау жұмыстарының көлемін, сапасын және жобалау-сметалық құжаттамаға сәйкестігін бақылауға, сондай-ақ нақты орындалған жұмыстарды растауға міндетті болған. Көрсетілген қызметтер үшін ақы толық төленгенімен, құрылыс барысына тиісті бақылау жасалмаған», — деп көрсетті агенттіктен.

Кәсіпорын басшысы жұмыс көлемі туралы жалған мәліметтер жазылған атқарылған жұмыстар актілеріне қол қойып отырған. Тінту кезінде одан мөрлердің телнұсқалары мен жалған актілер табылды. Қазіргі уақытта ЖШС басшысына іздеу жарияланып, сот шешімімен оны күзетпен ұстау түріндегі бұлтартпау шарасына санкция берілді.

Бұған дейін Қостанайда «Beef Export Group» ЖШС басшысы бастаған қылмыстық топтың субсидияны заңсыз алу схемасын ұйымдастырғаны хабарланған болатын. Оған ауыл шаруашылығы басқармасының лауазымды тұлғалары, сондай-ақ аудандық ауыл шаруашылығы өнімдерін өндірушілер мен ветеринария мамандары қатысқан.

Мұндай жымқыру схемасы Түркістан облысының ветеринария қызметінде де әшкереленді. Сондай-ақ Көкшетауды абаттандыру кезінде 160 млн теңгеден астам қаражат қолды болса, елордалық емханалардың бірінде 675 млн теңге бюджет қаражаты жылыстатылған.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз