Ақтау порты 2026 жылдың соңына дейін 7 метрге дейін тереңдетіледі
Транскаспий халықаралық көлік бағытының өткізу қабілеті 10 млн тоннаға жеткізілмек
Қазақстан Ақтау портының әлеуетін арттыруға кірісті. Ақтау теңіз портында кеме қатынасының қауіпсіздігін арттыруға және Транскаспий халықаралық көлік бағытының (ТХКБ) өткізу қабілетін ұлғайтуға бағытталған Ақтау порты акваториясын тереңдету жобасын іске асыру жалғасуда, деп хабарлайды Kapital.kz іскерлік ақпарат орталығы Көлік министрлігіне сілтеме жасап.
Ведомство хабарлағандай, бүгінгі таңда бас мердігер — China Harbour Engineering Company Ltd. компаниясы — жобаны іске асыру үшін қажетті геодезиялық зерттеу жұмыстарын және алынған деректерді өңдеуді аяқтады.
«Дайындық кезеңі аясында арнайы тереңдету жұмыстарын жүргізетін флоттың, басқа да техникалар мен жабдықтардың жұмылдырылуы жүргізілуде. Сонымен қатар, учаскеде қоршау бөгетін салу жұмыстары жалғасуда. Қазіргі уақытта жалпы ұзындығы 785 метр болатын құрылыстың 680 метрі салынды», делінген ақпаратта.
Негізгі тереңдету жұмыстарын бастау ағымдағы жылдың шілде айының екінші жартысына жоспарланған. Жобаны толық аяқтау 2026 жылдың соңына дейін көзделіп отыр.
«Жұмыстардың нәтижесінде порт акваториясы 6–7 метрге дейін тереңдетіледі. Бұл кемелердің толық жүктелуін қамтамасыз етуге және жүктерді өңдеу тиімділігін арттыруға мүмкіндік береді», деп қосты ведомствода.
Жоба ТХКБ әлеуетінің артуына ықпал ететін негізгі факторлардың бірі болады: 2028 жылға қарай оның қуатын 6 млн тоннадан 10 млн тоннаға дейін ұлғайту жоспарлануда. Бұл Қазақстанның Шығыс – Батыс бағыты бойындағы маңызды көлік-логистикалық торап ретіндегі рөлін одан әрі нығайтуға ықпал етеді.
Айта кетейік, 2026 жылдың 5 айында ТХКБ арқылы Қытай – Еуропа бағыты бойынша контейнерлік тасымал көлемі 30%-ға өсті.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
