Toyota шетелдегі зауыттарында көлік өндірісін 100 мыңға қысқартады
Ормуз бұғазының ұзақ уақыт бойы жабық болуы және соның салдарынан сұраныстың төмендеуі компанияны жоспарларын өзгертуге мәжбүр етті
Жапониялық Toyota Motor Corp. автоөндірушісі биылғы қаржы жылында (2027 жылдың наурызында аяқталады) шетелдегі зауыттарында көлік өндірісін шамамен 100 мың данаға қысқартуды жоспарлап отыр. Бұл туралы Nikkei басылымы хабарлады. «Интерфакс-Қазақстан» агенттігінің мәліметінше, компания бөлшектер жеткізетін ірі серіктестеріне өндіріс жоспарының қайта қаралғанын мәлімдеген.
АҚШ пен Израильдің Иранға жасаған соққыларынан кейін танкерлердің Ормуз бұғазы арқылы өтуі тоқтап, жанармай бағасы күрт өсті. Бұл Қытайда, Таяу Шығыста және әлемнің басқа да аймақтарында автомобильдерге деген сұраныстың азаюына әкеп соқты.
Дегенмен, Toyota мамыр айында жарияланған бастапқы жоспармен салыстырғанда, жылдың екінші жартысында Жапониядағы кәсіпорындарында өндірісті 4,2 мың көлікке арттыруды көздеп отыр. Бұл өзгеріс, соның ішінде, RAV4 және Land Cruiser 250 жол талғамайтын көліктеріне де қатысты.
Мамыр айындағы болжамға сәйкес, Toyota 2027 қаржы жылында түсімді 0,6%-ға арттырып, 51 трлн иенаға (320 млрд доллар) жеткізуді жоспарлаған, бұл ретте таза пайда 22%-ға төмендеп, 3 трлн иенаны құрауы мүмкін. Сондай-ақ, компания 10 млн-ға жуық автомобиль сатуды ниет еткен болатын (1%-ға өсім).
Автоөндірушінің капиталдануы соңғы үш айда шамамен 20%-ға төмендеді, ал осы тұста Nikkei 225 қор индексі шамамен 29%-ға өсті.
Бұған дейін Toyota Motor Corp. құрамдас бөлшектерді жеткізушілерге 2026 жылы 10 млн-нан астам автомобиль шығаруды көздеп отырғанын мәлімдеген еді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
