Семейдің жаңа, заманауи орталығы қандай болмақ?
Қазақстан өңірлері қалаға зәулім спорт кешендерін, медиаорталық, Достық үйі мен жаңа мектептер сыйға тартады
Семейде республикалық «Абайға құрмет» акциясы аясында медиаорталық, шығармашылық кешен және үстел теннисі орталығының құрылысы басталды. Бұл нысандарды қалаға Алматы, Шымкент қалалары мен Павлодар облысы тарту етіп отыр. Абай облысының әкімі Берік Уәли жаңадан бой көтеріп жатқан Smart City құрылыс алаңына барып, жұмыс барысымен танысты. Бұл туралы Kapital.kz іскерлік ақпарат орталығы әкімдіктің баспасөз қызметіне сілтеме жасап хабарлайды.
Өңір басшысы алдымен Алматы қаласының тартуы – медиаорталық құрылысын көрді. Жалпы аумағы 4839,06 шаршы метрді құрайтын төрт қабатты ғимаратта бейнежазба және аудиостудиялар, монтаждау бөлмелері, конференция залы, кинозал мен коворкинг аймақтары орналасады. Сондай-ақ мұнда демалыс орындары, дәмхана, медиатека және басқа да қажетті инфрақұрылым қарастырылған. Ғимарат маңында Журналистер аллеясы ашылады.
Семейдің жаңа әкімшілік-іскерлік орталығында Шымкент қаласы сыйға тартқан шығармашылық орталықтың да құрылысы қызу жүріп жатыр. Жалпы аумағы 1210,51 шаршы метр болатын үш қабатты ғимарат оқу, жалпымектептік және әкімшілік-шаруашылық блоктарынан тұрады. Оқу бөлімі музыка, хореография және бейнелеу өнері бағыттарына арналған. Жоба 150 оқушыға лайықталған.
Облыс әкімі Павлодар облысының тартуы – Үстел теннисі орталығының құрылыс алаңына ат басын бұрды. Жалпы аумағы 2580,61 шаршы метр болатын екі қабатты спорт нысанында бас вестибюль, медициналық және күзет бөлмелері, спортшыларға арналған киім ауыстыратын орындар, жаттықтырушылар, төрешілер мен әкімшілік қызметкерлер бөлмелері, сондай-ақ көрермендер мінбесі мен өзге де қажетті жайлар болады.
«Мемлекет басшысының тікелей қолдауымен жүзеге асып жатқан «Абайға құрмет» акциясы аясында бірден үш нысанның құрылысы басталды. Бұқаралық ақпарат құралдары қызметкерлері күні қарсаңында Алматы қаласының тартуы – медиаорталық құрылысының басталуы өңір журналистері үшін үлкен қуаныш болды. Жобаның сәулеттік келбеті өте еңселі. Жаңа нысан Smart City ауданының көркіне айналары сөзсіз. Акция аясында бой көтеріп жатқан тағы бір ғимарат – Павлодар облысы сыйға тартқан Үстел теннисі орталығы. Бұл біздің өңір үшін өте қажет нысан. Өздеріңізге мәлім, облыста мұндай теннис орталығы әлі жоқ. Ең бастысы – басталған құрылыс жұмыстарының сапалы әрі уақтылы аяқталуын қамтамасыз ету. Біз бұны жіті бақылауда ұстаймыз. Осы сәтті пайдалана отырып, облыс тұрғындарының атынан «Абайға құрмет» акциясына қолдау көрсеткен Алматы мен Шымкент қалаларының, сондай-ақ Павлодар облысының әкімдеріне алғыс айтамын», – деді Берік Уәли.
Еске сала кетейік, Семейдің оң жағалауында аумағы 1000 гектар болатын жаңа әкімшілік-іскерлік орталық салу жоспарланған. Мұндағы тұрғын үй қорының жалпы көлемі 3 миллион шаршы метрден асса, әкімшілік және коммерциялық нысандардың ауданы 1,2 миллион шаршы метрді құрайды. Жаңа орталықта 75 мыңнан астам адам тұрады деп күтілуде. Сондай-ақ мәдениет, білім беру, денсаулық сақтау және спорт мекемелерін, қонақүйлерді, мейрамханаларды, бизнес-орталықтар мен заманауи қоғамдық кеңістіктерді қоса алғанда, 40-тан астам нысан салу көзделіп отыр.
Республикалық «Абайға құрмет» акциясы шеңберінде еліміздің өзге өңірлері де Семейде бірнеше әлеуметтік және мәдени нысан тұрғызады. Мәселен жаңа әкімшілік-іскерлік орталықта Маңғыстау облысының сыйы – Достық үйі, Бейбітшілік аралында Солтүстік Қазақстан облысының қолдауымен Мемлекеттік рәміздер алаңы, қаланың сол жағалауында Ақтөбе облысының демеушілігімен Жекпе-жек сарайы бой көтереді.
Сонымен қатар Түркістан облысы – көрме орталығын, Қызылорда облысы – «Анаға тағзым» орталығын, Атырау облысы – «Абай әлемі» орталығын, Жетісу облысы – Семейге кіреберістегі қала қақпасын, Батыс Қазақстан облысы – спорт кешенін, Қостанай облысы – рухани орталықты, Астана қаласы – «Келешек» мектебін салады, ал Шығыс Қазақстан облысы – Ертіс өзенінің жағалауын абаттандыру жұмыстарын мойнына алды. Шымкент қаласы шығармашылық орталықтан бөлек, Семейге қарасты Водный кентіне Мәдениет сарайын тарту етеді.
Қоғамдық қорлар, ұлттық компаниялар мен бизнес-құрылымдар есебінен де тағы бірнеше әлеуметтік және спорттық нысан бой көтереді. Жоспар бойынша KAZ Minerals компаниясы жаңа әкімшілік-іскерлік орталықта зәулім стадион салады, «Самұрық-Қазына» қоры Мирный кентінде дене шынықтыру-сауықтыру кешенінің құрылысын бастап кетті, «Қазақстан халқына» қоғамдық қоры – Инклюзивті спорт орталығын, «Қазақстан темір жолы» – дене шынықтыру-сауықтыру кешенін, ал «ҚазМұнайГаз» компаниясы – «Болашақ» сарайын тұрғызады.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
