• Басты бет
• Технологиялар
• Қазақстан мен Ресей пилотсыз режимдегі алғашқы халықаралық тасымалды іске қосты

Қазақстан мен Ресей пилотсыз режимдегі алғашқы халықаралық тасымалды іске қосты

Пилотсыз технологиялар халықаралық жүк тасымалының жаңа кезеңіне жол аша бастады

Қазақстан мен Ресей бірлесіп алғашқы халықаралық пилотсыз жүк тасымалы жобасын іске қосты. Жоба аясында маршруттың жекелеген учаскелері екі ел аумағында пилотсыз режимде жүріп өтті. Рейс бір уақытта Мәскеу – Астана және Астана – Мәскеу бағыттары бойынша ұйымдастырылды, деп хабарлайды Kapital.kz іскерлік ақпарат орталығы Көлік министрлігіне сілтеме жасап.

Екі елдің Көлік министрліктері «КАМАЗ» компаниялар тобымен бірлесіп, бірегей жобаны — екі елдің астаналары арасындағы жүк автокөлік құралдарының пилотсыз жүруін сәтті жүзеге асырды. Алғашқы сынақ рейсі Қазақстан Республикасы мен Ресей Федерациясы арасындағы стратегиялық ынтымақтастықтың маңызды кезеңіне айналды және тараптардың жоғары технологиялық көлік секторын белсенді дамытуға дайын екендігін көрсетті.

«Сынақтық рейс барысында мамандар пилотсыз жүйелердің негізгі жұмыс тетіктерін тексерді. Атап айтқанда, маршрут бойындағы байланыс сапасы, жолдың цифрлық көшірмесінің дәлдігі, сондай-ақ байланыс болмаған жағдайдағы көліктің әрекеті сыналды. Бұл жоба Еуразиялық экономикалық одақ аясында пилотсыз тасымалдарға қатысты үйлестірілген заңнаманы қалыптастыруға жасалған алғашқы қадам болды», делінген Қазақстанның Көлік министрлігі таратқан ақпаратта.

Ведомство мәліметінше, пилотсыз технологиялар көлік саласын қауіпсіздік, тиімділік және бәсекеге қабілеттілік тұрғысынан жаңа деңгейге шығарады. Оның басты артықшылықтарының бірі — жол-көлік оқиғаларының негізгі себептерінің бірі саналатын адам факторын барынша азайтады.

Сонымен қатар, жоба әлемдік логистика саласындағы басты мәселелердің бірі — жүк көлігі жүргізушілерінің тапшылығына технологиялық жауап болмақ. Егер жүргізуші орта есеппен тәулігіне шамамен 8 сағат көлік жүргізсе, пилотсыз көлік іс жүзінде тәулік бойы жұмыс істей алады. Бұл тасымал өнімділігін едәуір арттырып, рейстер санын бірнеше есеге көбейтуге мүмкіндік береді.

Жоба аясында пилотсыз жүк автокөліктері шамамен 3000 шақырымдық бағытты екі тәулікте жүріп өтіп, жол жүру уақытын екі еседен астам қысқартқан.

Пилотсыз технологияларды енгізу пайдалану шығындарын азайтуға, бос тұрып қалу уақытын қысқартуға және халықаралық тасымалдардың тиімділігін арттыруға мүмкіндік береді, деді министрлік.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз