Roca Group Қызылордада жаңа зауыт салады
Жаңа зауыт қашан ашылады және қандай өнім шығарады?
Қызылорда облысында сантехника бұйымдарын шығаратын зауыт салынады. Бұл туралы өңір әкімі Мұрат Ергешбаев пен Қызылорда облысына жұмыс сапарымен арнайы келген «Roca Group» компаниясының бас директоры Даниэль Хурадо Эрнандестің кездесуінен соң белгілі болды, деп хабарлайды Kapital.kz іскерлік ақпарат орталығы.
Облыс әкімдігінің мәліметінше, кездесуде аймақ басшысы өңірдің инвестициялық әлеуеті, өндіріс орындарын дамытуда атқарылып жатқан жұмыстар, алда жүзеге асатын жобалар туралы айтты.
«Сантехникалық бұйымдар өндірісіндегі әлемдік көшбасшылардың бірі, ғасырдан астам тарихы бар «Roca Group» компаниясымен серіктестік орнату - біз үшін үлкен мәртебе. Соңғы төрт жылда аймағымызға 2,3 трлн теңгеден астам инвестиция тартылды. Оның басым бөлігі - жеке инвестициялар. Алдағы уақытта жаңа өндіріс орындарын ашу мақсатында 1 трлн теңгеге 14 ірі жобаның құрылысы басталады. Ертең Өздеріңізбен бірге көптен күткен «Roca» зауытының іргетасын қалаймыз», деді Мұрат Ергешбаев.
Айта кетейік, санитарлық-техникалық бұйымдар өндіру жобасы 2024 жылдан қолға алынған, Қызылорда облысының делегациясы Испания Корольдігіне арнайы іссапармен барып, компанияның өндіріс орындарымен танысты.
Былтыр «Roca Group», ҚР Өнеркәсіп және құрылыс министрлігі және Қызылорда облысының әкімдігі арасында үшжақты келісімге қол қойылып, желтоқсан айында инвестициялық келісім жасалды.
«Мемлекеттік қолдау ретінде Қызылорда қаласындағы «Өндіріс» индустриялық аймағынан 24 гектар жер телімі берілді. Сонымен қатар Үкіметпен бірлесіп, елімізде өндірілмейтін, инновациялық және экспортқа бағытталған жоғары сапалы өнім шығаратын жобалар үшін шикізат тасымалы шығындарының бір бөлігін өтеу мүмкіндіктері қарастырылуда», деп қосты Мұрат Ергешбаев.
Санитарлық-техникалық бұйымдар шығаратын зауыт Қызылорда қаласында салынады, оған «Roca Group» компаниясы 44,1 млрд теңге инвестициялайды. Кәсіпорында 300 адам жұмыспен қамтылып, жылына 500 мың өнім өндіріледі деп жоспарланып отыр.
.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
