Семейде базарлардағы ескі контейнерлерді бұзу жұмыстары басталды
Жаңа павильондар құрылысы жазда қолға алынады
Абай облысының орталығындағы сауда инфрақұрылымын жаңғырту мәселесі облыс әкімі Беріқ Уәлидің төрағалығымен өткен аппараттық кеңесте қаралды. Өңір басшысы базарларды жаңғырту, инженерлік желілер тарту және қаржыландыру мәселелері ерекше бақылауда болуы тиіс екенін атап өтті, деп хабарлайды Kapital.kz іскерлік ақпарат орталығының тілшісі облыс әкімдігіне сілтеме жасап.
Кәсіпкерлік және индустриялық-инновациялық даму басқармасының басшысы Айбек Рахымбековтің айтуынша, Семейдегі «СМОКК» базары бойынша құрылысқа арналған жобалық-сметалық құжаттама дайындалған. Су және кәріз желілерін тарту жұмыстары аяқталып, техникалық шарттар алынған. Қазіргі уақытта контейнерлер мен жабын құрылымдарын бұзу жүргізілуде. Бірқатар жалға алушылар «Северный» сауда-логистикалық орталығына және Кашағанов көшесінің қарсы бетіндегі уақытша сауда алаңдарына көшірілген. Дайындық жұмыстары аяқталған соң құрылыс-монтаж жұмыстары басталады.
«Мереке» базарында сауда үйін салуға арналған алаң дайындалып, контейнерлерді бұзу жұмыстары жүргізіліп жатыр. Құрылысты 2026 жылдың маусым–шілде айларында бастау жоспарланған. Негізгі сауда қатары жұмысын жалғастыруда.
«Ақшың» базарында сауда үйінің қасбетін жаңарту және сырлау жұмыстары жүріп жатыр. «Жансая» базары бойынша эскиздік жоба әзірленіп, көше бойындағы сауда қатарларын ретке келтіру және қасбетті жаңарту жұмыстары кезең-кезеңімен іске асырылмақ. Базар аумағындағы контейнерлерді бұзу да жалғасуда.
Ескертулерден кейін «Нива» сауда үйін жаңғырту жұмыстары басталған. Шатырын жөндеу жүріп жатыр, ғимараттың сырт келбетін жаңарту бойынша эскиздік жоба дайындалды. «Турист» қонақүйі бойынша да эскиздік жоба әзірленген. Сондай-ақ Rakhat Palace қонақүйі мен «Жақсылық» бизнес-орталығын қайта жаңарту жұмыстары басталды.
«Жалпы сауда нысандарын жаңғырту және олардың сыртқы келбетін ретке келтіру жұмыстары кезең-кезеңімен жалғасып жатыр. Бірқатар нысандарда оң өзгерістер байқалады. Дегенмен кейбір базарларда инженерлік инфрақұрылымға қосу, қаржыландыру және құрылыс қарқынын арттыру мәселелері өзекті күйінде қалып отыр. Сондықтан бұл мәселелер тұрақты бақылауда болуы тиіс», – деді Берік Уәли.
Айта кетейік, бұған дейін Семейде үш ірі базарды жаңғырту жоспарланғаны хабарланған. Жұмыстар 2028 жылға дейін аяқталуы тиіс.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
