ІІМ: алаяқтар айыппұл туралы жалған хабарламалар таратып жатыр
Азаматтардың жеке деректерін иемдену үшін күмәнді сілтемелер жіберілуде
Қазақстан Республикасы Ішкі істер министрлігінің баспасөз қызметі азаматтарға жолданатын жалған SMS-хабарламалардың жиілегені туралы ескертті, деп хабарлайды Kapital.kz іскерлік ақпарат орталығы.
«Қарағанды облысы полиция департаменті «ҚР Жол полициясы департаменті» деген тақырыппен келетін, әкімшілік айыппұлдар төленбегені туралы жалған SMS-хабарламалардың жиілегенін ескертеді», – делінген министрлік хабарламасында.
Полиция мәліметінше, мұндай хабарламаларды алаяқтар азаматтардың жеке деректерін алу және қаржысын иемдену мақсатында таратады. Әдетте хабарламаларда күмәнді интернет-ресурстарға сілтемелер беріледі, оған өту жеке ақпараттың таралуына әкелуі мүмкін.
Осыған байланысты тұрғындарға тек ресми ақпарат көздеріне сену және барынша сақ болу ұсынылады. Әкімшілік айыппұлдардың бар-жоғын тек мемлекеттік сервистер арқылы тексеруге болады:
– qamqor.gov.kz
– eGov.kz
– сондай-ақ екінші деңгейлі банктердің мобильді қосымшалары.
Полиция белгісіз сілтемелерге өтпеуге, күмәнді сайттарға жеке деректер мен банк карталарының мәліметтерін енгізбеуге шақырды. Мұндай хабарламалар түскен жағдайда оларды елемеу және қажет болғанда құқық қорғау органдарына жүгіну ұсынылады.
Айта кетейік, бұған дейін министрлік азаматтарды аккаунттар мен SIM-карталарды үшінші тұлғаларға бермеуге шақырған болатын.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
