• Басты бет
• Технологиялар
• Премьер-министр қазақстандық заңнаманы аэротакси мен дрондарға бейімдеуді тапсырды

Премьер-министр қазақстандық заңнаманы аэротакси мен дрондарға бейімдеуді тапсырды

Қажетті түзетулерді қабылдаудың соңғы мерзімі - маусым айының соңы деп белгіленді

Қазақстан аэротакси, дрондар мен басқа да заманауи ұшу аппараттарын енгізуге байланысты авиацияны дамытудың жаңа кезеңіне дайындықты бастайды. Үкімет отырысында тиісті тапсырманы Премьер-министр Олжас Бектенов берді, деп хабарлайды Kapital.kz іскерлік ақпарат орталығының тілшісі.

Министрліктер кабинетінің басшысы Көлік министрлігіне биылғы жылдың соңына дейін азаматтық авиацияны 2050 жылға дейін дамытудың мастер-жоспарын — CAMP 2050 бекіту жұмыстарын аяқтауды тапсырды.

Олжас Бектеновтің айтуынша, құжат тек дәстүрлі авиация саласын дамытуды ғана емес, сонымен қатар келешегі бар бағыттарды да ескеруі тиіс. Атап айтқанда, жоспарға кіші және өңірлік авиацияны, ұшқышсыз әуе көлігін, сондай-ақ баламалы авиациялық отынды пайдалану және сақтау технологияларын дамыту бойынша шараларды енгізу қажет.

Премьер-министр әлемдегі ең ірі авиациялық реттеушілер әуе көлігінің жаңа түрлерін енгізуге дайындықты бастап кеткенін атап өтті.

«Еуропадағы EASA және АҚШ-тағы FAA сияқты әлемдік реттеушілер коммерциялық аэротакси аппараттарын сертификаттау ережелерін әлдеқашан әзірлеп қойған. Біз де аэротаксиді, дрондарды және ұшу аппараттарының басқа да жаңа түрлерін іске қосуға дайын болуымыз керек», — деді Бектенов үкімет отырысында.

Осыған байланысты Көлік министрлігіне маусымның аяғына дейін қалалық әуе ұтқырлығына — UAM қатысты қажетті заңнамалық түзетулердің қабылдануын қамтамасыз ету тапсырылды.

Еске сала кетейік, бұған дейін Премьер-министрдің орынбасары — Жасанды интеллект және цифрлық даму министрі Жаслан Мәдиев Қазақстанда инновациялық көлік жүйелерін енгізу үшін базалық жағдайлар жасалғанын хабарлаған болатын.

Бүгін үкімет отырысында Қазақстандағы авиация саласын дамыту мәселесі талқыланды. ҚР-дағы тұрақты авиарейстерді ҚҚС-тан босату жоспарланып отырғаны белгілі болды. Сондай-ақ Токио мен Нью-Йоркке тікелей авиарейстерді іске қосу мерзімдері аталды.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Сізге қызықты болуы мүмкін

Kapital.kz-ті оқыңыз