• Басты бет
• Технологиялар
• Қазақстанда корпоративтік қоңырауларды таңбалау енгізілуі мүмкін

Қазақстанда корпоративтік қоңырауларды таңбалау енгізілуі мүмкін

Бұл шара телефон алаяқтығына қарсы күрес үшін қажет

Қазақстанда заңды тұлғалардан түсетін қоңырауларды міндетті түрде таңбалау мәселесі қарастырылып жатыр. Аталған шара телефон алаяқтығы жағдайларын азайтып, кіріс қоңырауларға деген сенімді арттыруға бағытталған. Бұл туралы премьер-министрдің орынбасары – жасанды интеллект және цифрлық даму министрі Жаслан Мәдиев айтты, деп хабарлайды Kapital.kz іскерлік ақпарат орталығының тілшісі.

Жаслан Мәдиевтің айтуынша, бастаманың негізгі мақсаты – абонентке қоңыраудың ресми ұйымнан түсіп жатқанын алдын ала көрсету. Бұл банктер мен мемлекеттік органдардың атынан хабарласатын алаяқтарды ажыратуға мүмкіндік береді.

«Азаматтарды телефон алаяқтығынан қорғау үшін заңды тұлғалардың қоңырауларын таңбалау енгізіледі. Бұл абоненттерге ресми қоңырауларды күмәнді қоңыраулардан ажыратуға мүмкіндік береді», – деді министр мәжілістің пленарлық отырысында.

Сонымен қатар Жаслан Мәдиев елдегі смартфондарды верификациялау жүйесінің жұмысына қатысты пікір білдірді. Отырыс барысында депутаттар премьер-министр тапсырмасынан кейін неге бұрынғы схема бойынша қаражат жинау тоқтатылмағанын сұрады.

Министрдің сөзінше, верификация жүйесі жалпы алғанда тиімділігін көрсетті. Оның арқасында заңды импорт көлемі өсіп, ресми дилерлердің сатылымы артқан.

«Азаматтар үшін верификация бұрынғыдай тегін болып қала береді. Ешкім ештеңе төлемейді. Мұнда ешқандай жеке монополия болған жоқ және ондай мақсат қойылмаған. Нақты критерийлер мен түсінікті ережелер бар. Тиісті ақпараттық жүйені және жергілікті ғана емес, халықаралық интеграцияларды қамтамасыз ете алатын кез келген компания бұл қызметті көрсете алады», – деп түсіндірді Жаслан Мәдиев.

Еске салайық, бұған дейін Астанада байланыс операторының қызметкері ретінде таныстырған алаяқтар тұрғынның ұялы телефонына қол жеткізіп, 20 млн теңгесін жымқырған болатын.

ІІМ телефон алаяқтарының жаңа тәсілдерді қолданып жатқанын хабарлаған еді. Елде алаяқтардың компания, мемлекеттік орган және жоғары оқу орындарының басшылары атынан хабарласу фактілері көбейіп келеді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз