- Басты бет
- Технологиялар
- Қазақстандық стартап Big4 компаниясымен серіктестік орнатып, АҚШ нарығына шықты
Қазақстандық стартап Big4 компаниясымен серіктестік орнатып, АҚШ нарығына шықты
Стартап бұған дейін халықаралық инвесторлардан 21,5 млн доллар инвестиция тартқан
Қазақстандықтар негізін қалаған Nace.AI стартапы Big4 компанияларының бірімен ұзақ мерзімді келісімшарт жасап, АҚШ нарығына шықты, деп хабарлайды Kapital.kz іскерлік ақпарат орталығы.
Компания мұны Nace.AI әзірлемелерінің халықаралық нарықта сұранысқа ие екенін айқын көрсетеді деп бағалайды.
«Біз олармен жұмысқа кірістік және тиісінше NDA қол қойдық, бірақ компанияның Big4-ке кіретінін және келісімшарттың ұзақ жылдарға жасалғанын айта аламыз. Стартапымызды әлемнің озық компаниялары таңдап отырғанына қуаныштымын. Біз бірінші кезекте стратегиялық тәсіл мен іргелі ғылымға мән береміз», - деді компания басшысы Бақытжан Дос.
Nace.AI нақты бизнес-нәтиже беруге бағытталған және жоғары дәлдікпен жұмыс істейтін мамандандырылған тілдік модельдерді әзірлейді. Компанияның негізгі өнімі — NAVI платформасы қаржылық аудит процестерін автоматтандырып, ауқымды деректерді талдау арқылы маңызды көрсеткіштер мен ықтимал тәуекелдерді анықтайды. Қазірдің өзінде компанияның шешімдері клиенттерге тапсырмаларды орындау уақытын шамамен 20 есеге дейін қысқартуға мүмкіндік беріп отыр.
Айта кетейік, компания стратегиясының негізінде іргелі ғылым мен инженерлік тәжірибені ұштастыру тәсілі жатыр. Nace.AI әмбебап шешімдерден гөрі нақты міндеттерге бейімделген, ықшам әрі жоғары дәлдік көрсететін мамандандырылған модельдерді дамытуға басымдық береді. Мұндай жүйелер клиенттердің ішкі процестеріне тереңірек интеграцияланып, қолданбалы міндеттерді тиімдірек орындауға мүмкіндік береді.
Еске салсақ, бұған дейін Nace.AI халықаралық инвесторлардың жоғары сенімінен шығып, 21,5 млн АҚШ доллары мөлшерінде инвестиция тартқанын хабарлаған болатын. Бүгінде компания белсенді түрде ауқымын кеңейтіп, командасын жинақтап жатыр.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
