Қазақстандық ғалымдар өндіріс түтінін 40 есе тазартатын отандық технология әзірледі

Ақтөбелік ғалымдар өндірістік кәсіпорындардан бөлінетін зиянды қалдықтарды айтарлықтай азайтатын жаңа технология әзірледі. Қ.Жұбанов атындағы Ақтөбе өңірлік университетінің зерттеушілері ұсынған шешім өндірістік түтін құрамындағы шаң мен зиянды заттардың көлемін ондаған есе төмендетуге мүмкіндік береді, деп хабарлайды Kapital.kz іскерлік ақпарат орталығы.

Жоба қазірдің өзінде өндірісте сынақтан өтіп жатыр. Технология Ақтөбе, Ақсу және Екібастұз қалаларындағы бірқатар өнеркәсіп нысандарында енгізілуде. Ол металлургия, энергетика, тамақ өнеркәсібі және құрылыс материалдарын өндіру салаларына бейімделген.

Атап айтқанда, әзірлеме Ақтөбе ферроқорытпа зауытында қолданылғаннан кейін өндірістік түтін құрамындағы зиянды компоненттер шамамен 40 есеге дейін азайған. Соның нәтижесінде атмосфераға шығатын шаң мен газдардың басым бөлігі сүзгіден өткізіліп, қоршаған ортаға түсетін жүктеме төмендейді.

Жобаның негізгі артықшылығы – оның толықтай отандық технология ретінде іске асырылуы. Бұған дейін мұндай газ тазарту жүйелері көбіне шетелден импортталатын. Жаңа шешім қазақстандық кәсіпорындарға тиімді әрі қолжетімді балама ұсынады.

Ғалымдар жоғары нәтижеге сүзгі-қаптарды жаңаша регенерациялау жүйесін енгізу арқылы қол жеткізген. Бұл әдіс сүзгінің тиімділігін арттырып қана қоймай, оның қызмет ету мерзімін ұзартуға және өндірістік процестің тұрақтылығын қамтамасыз етуге мүмкіндік береді.

Зерттеу жұмыстарына техника ғылымдарының кандидаты, профессор Марат Иманғазин, PhD доктор, қауымдастырылған профессор Бағдагүл Уахитова және коммерцияландыру және стартаптар департаментінің директоры Нұрбек Дүймұханов қатысуда. Жоба экологиялық қауіпсіздік талаптарына және «жасыл» технология қағидаттарына сәйкес келеді.

Жоба Қ.Жұбанов атындағы Ақтөбе өңірлік университеті мен Қарағандыдағы «KazEnergoMashEkologia» ЖШС арасындағы ғылыми-техникалық ынтымақтастық аясында жүзеге асырылып жатыр. Сүзгілеу жүйесінің негізгі жабдықтары өндірістік серіктестің базасында құрастырылады.

Айта кетейік, жоба 350 млн теңге көлемінде мемлекеттік грантқа ие болған. Сонымен қатар өнеркәсіптік серіктес тарапынан 123 млн теңгеден астам инвестиция тартылған. Екі жыл ішінде жалпы құны шамамен 380 млн теңгені құрайтын газ тазарту жабдықтары әзірленіп, өндірісте қолданылып келеді.