Еуропа Қазақстанға €500 млн инвестиция салады
Өнеркәсіп министрі Брюссельде бірнеше меморандумға қол қойды
Қазақстан Президенті Қасым-Жомарт Тоқаевтың Бельгия Корольдігіне жасаған ресми сапары аясында Өнеркәсіп және құрылыс министрі Ерсайын Нағаспаев Қазақстан мен ЕО арасындағы өнеркәсіптік кооперацияны дамытуға бағытталған бірқатар құжаттарға қол қойды әрі еуропалық бизнес өкілдерімен екіжақты кездесулер өткізді, деп хабарлайды Kapital.kz іскерлік ақпарат орталығы министрліктің баспасөз қызметіне сілтеме жасап.
Ведоммтвоның хабарлауынша, ҚР Өнеркәсіп және құрылыс министрлігі мен Еуропалық қайта құру және даму банкі (ЕҚДБ) арасында Минералдар мен металдар саласындағы озық тәжірибе орталығын құру үшін техникалық-экономикалық негіздемені әзірлеу жөніндегі өзара түсіністік пен ынтымақтастық туралы меморандумға қол қойылды. Аталған жоба зерттеу қызметі мен озық технологияларды ұштастыратын заманауи геологиялық кластер қалыптастыруға мүмкіндік береді.
Сонымен қатар Өнеркәсіп және құрылыс министрлігі желісі бойынша бірқатар стратегиялық келісімдер жасалды. Атап айтқанда, ауыл шаруашылығы техникасын өндіретін жетекші еуропалық компаниялар — Dewulf NV және Väderstad Group-пен Қазақстан аумағында ауыл шаруашылығы техникасын өндіруді локализациялау жобаларын іске асыру туралы келісімдерге қол қойылды. Жобалардың жалпы инвестиция көлемі €500 млн-ды құрайды. Қазақстан тарапынан серіктестер ретінде «АгромашХолдинг KZ» АҚ мен Eurasia Group AG компаниясы қатысады.
Dewulf NV компаниясы картоп жинайтын техниканы, ал Väderstad Group топырақ өңдеу техникасын өндіруді локализациялайды. Өндіріс орындары Қостанай және Түркістан қалаларындағы «АгромашХолдинг KZ» АҚ-ның локализациялау орталықтары базасында орналастырылады.
Одан бөлек, «Жезқазғансирекмет» РМК еуропалық «EIT RawMaterials» қауымдастығымен қазақстандық мамандарды оқыту жөніндегі және «P&P Industries AG» компаниясымен күкірт қышқылы зауытын салудың техникалық-экономикалық негіздемесін әзірлеу туралы келісімшарттарға қол қойды.
Бұған қоса Брюссель қаласында Ерсайын Нағаспаев Alphamar Resources қорының Еуропадағы серіктесі Грегори Камюмен, Danieli Group компаниясының бас директоры Джакомо Марески Даниэлимен және BAUER Röhren- und Pumpenwerk Ges.m.b.H. компаниясының басқарушы директоры Отто Ройсспен кездесті.
Кездесулер барысында стратегиялық маңызды минералдар, сондай-ақ металлургия және ауыл шаруашылығы машиналарын жасау бағыттарындағы ынтымақтастықты кеңейту мәселелері талқыланды.
Келіссөздер қорытындысы бойынша тараптар перспективалы бағыттар бойынша өзара тиімді серіктестікті одан әрі дамытуға уағдаласты.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Сізге қызықты болуы мүмкін
Kapital.kz-ті оқыңыз
