Қазақстанда жасанды интеллект тау-кен кәсіпорындарына енгізіліп жатыр

QazIndustry Қазақстандық индустрия және экспорт орталығының мамандары өндірістегі цифрлық трансформацияның барысымен алтын өндіруші Solidcore Resources компаниясының мысалында танысты. Елордадағы кеңсеге жасалған сапар барысында енгізілген жасанды интеллект жүйелерінің тиімділігі мен өндірісті одан әрі автоматтандыру жоспарлары зерделенді, деп хабарлайды Kapital.kz іскерлік ақпарат орталығы.

Жол картасы аясында Solidcore Resources кәсіпорындарында тау-кен саласындағы қауіпсіздік пен өндіріс тиімділігін арттыруға бағытталған жасанды интеллекттің төрт элементін іске асыру жоспарланған.

Жобаның алғашқы кезеңінде Абай облысындағы Бақыршық тау-кен өндіру кәсіпорнында автоматтандырылған медициналық тексеру жүйесі іске қосылды. Жүйенің үздіксіз жұмысын қамтамасыз ету үшін ауданы 100 шаршы метр болатын заманауи медициналық пункт салынған. Қазіргі уақытта қызметкерлерді ауысым алдындағы медициналық тексеру бірнеше минут ішінде жүргізіледі.

Жасанды интеллект жүйесі адам факторын барынша азайтады. Егер қызметкерде қан қысымының жоғарылауы, қатты шаршау белгілері немесе масаңдық анықталса, оған қауіпті жұмыстарды атқаруға автоматты түрде рұқсат берілмейді.

«Қауіптің алдын алу арқылы біз жұмысшыларымыздың өмірін сақтап қана қоймай, бюджет қаржысын да үнемдейміз. Яғни қаражатты төтенше жағдайлардың салдарын жоюға емес, компанияның дамуына бағыттаймыз», – дейді Solidcore Resources кәсіпорнының өкілдері.

Қазіргі уақытта құрамына Қостанай облысындағы Варварин хабы мен Павлодар өңіріндегі Ертіс гидрометаллургиялық комбинаты кіретін Solidcore Resources компаниясында жасанды интеллектке негізделген тағы екі жүйені іске қосуға дайындық жүргізілуде. Олар – жұмысшыларды нүктелік және аймақтық позициялау жүйесі және оператордың цифрлық ассистенті.

Бірінші жүйе әр қызметкердің орналасқан жерін нақты уақыт режимінде бақылап, қауіпті аймақтарда қатер туындаған жағдайда дереу ескерту жасауға мүмкіндік береді. Ал оператордың цифрлық ассистенті қызметкерлерге шешім қабылдау кезінде интеллектуалдық қолдау көрсетіп, технологиялық үдерістердің режимдерін оңтайландыруға және өндірістік апаттардың алдын алуға көмектеседі.

Жыл соңына дейін Solidcore Resources кәсіпорындарында флотация процесін бақылау және басқару жүйесін енгізу жоспарланған. Бұл жоба бойынша пайдалы қазбаларды байыту үдерісін жасанды интеллект бақылап отырады. Нәтижесінде металл мен реагенттер шығынын азайтуға мүмкіндік туады.

QazIndustry өкілдері жүзеге асырылып жатқан жасанды интеллект жобаларының тиімділігі жоғары екенін атап өтті. Сондай-ақ орталық мамандары кәсіпорынның цифрлық трансформациясы бойынша консультативтік және талдамалық қолдау көрсетуге дайын екенін жеткізді.