Астанада «Болашақ ойындары» қашан өтетіні белгілі болды

Астанада өтетін «Болашақ ойындарының» (Games of the Future) нақты уақыты белгілі болды, деп хабарлайды Kapital.kz іскерлік ақпарат орталығы турнирдің ресми сайтына сілтеме жасап.

«2026 жылдың 29 шілдесі мен 9 тамызы аралығында көпшіліктің назары Астанаға ауатын болады. Елордада физикалық және цифрлық спорт форматында өнер көрсететін әлемнің үздік спортшылары жиылып, «Болашақ ойындарына» қатысады. Өткен жылдың желтоқсанында Абу-Дабиде өткен әсерлі турнирден кейін Астана бұл деңгейді одан әрі көтеруге дайын», – делінген хабарламада.

Еліміздің бас қаласына әлемнің әр түкпірінен 900-ден астам спортшы келеді деп күтілуде. Олар фиджитал форматында өнер көрсетеді. Бұл – физикалық және цифрлық спортты біріктіретін жаңа формат.

Жарыстар қаланың ірі спорт нысандарында өтеді. Олардың қатарында «Барыс Арена», «Beeline Arena», «Қазақстан» жеңіл атлетика спорт кешені, «Алау» мұз сарайы және Жақсылық Үшкемпіров атындағы Жекпе-жек сарайы бар.

Қатысушылар жалпы жүлде қоры 4,75 млн доллар болатын жарыста бақ сынайды. Сайыс сегіз сайыс түрі бойынша өтеді. Олардың қатарында фиджитал-футбол, фиджитал-баскетбол, фиджитал-шутер, фиджитал-би, фиджитал-файтинг, сондай-ақ мобильді құрылғыларға арналған MOBA, компьютерге арналған MOBA және «корольдік шайқас» бар.

2024 жылдың күзінде Phygital Games of the Future 2026 турнирін өткізуге Қазақстан, Перу және Чили үміткер болғаны белгілі болған. Нәтижесінде 2026 жылғы «Болашақ ойындарын» өткізу мәртебесі Қазақстанға берілді.

Айта кетейік, «Болашақ ойындарын» Қазақстанда өткізу бастамасын президент Қасым-Жомарт Тоқаев 2024 жылы Қазанда өткен алғашқы ойындардың ашылу салтанатында ұсынған болатын.