Қазақстанда байланыс операторларын гранттық қаржыландыруға арналған конкурс басталады

Қазақстан Республикасында «Қазақастанның инклюзивтік экономикасы үшін жедел цифрландыру» жобасы іске қосылады. Байланыс операторлары үшін үлестік гранттар алу конкурсы ашылады, деп хабарлайды Kapital.kz іскерлік ақпарат орталығы, жасанды интеллект және цифрлық даму министрлігінің баспасөз қызметіне сілтеме жасап.

«Конкурс жобаны іске асыру шеңберінде өткізіледі және ауылдық жерлерде телекоммуникациялық инфрақұрылымды дамытуға, сондай-ақ ауыл тұрғындарын жылдамдығы 100 Мбит/с кем емес интернетке қол жеткізуге бағытталған. Жоба интернетке локалды желісі жоқ 1 123 ауылдық елді мекенде оптикалық талшықты байланыс желілерін салуды қарастырады. Жобаны іске асыру 445 мыңнан астам үй шаруашылықтарын қосуға және шамамен 2,3 миллион адамға жоғары жылдамдықты интернетке қолжетімділікті қамтамасыз етуге мүмкіндік береді», – деп көрсетілген ақпаратта.

Жоба аясында байланыс операторларына ауылдық жерлерде телекоммуникациялық желілер салуға расталған негізгі шығындардың 50%-ына дейінгі мөлшерде қайтарымсыз үлестік гранттар берілмек. Құрылыс байланыс операторларының өз қаражаттары есебінен жүзеге асырылып, салынған инфрақұрылым өздерінің балансына қалдырылады.

Қатысушыларды іріктеу ашық конкурс негізінде, тең қолжетімділік, ашықтық және есеп беру қағидаттары сақтала отырып жүргізіледі.

Айта кетейік, ауылдық жерлерде интернет байланысын қамтамасыз ету үшін Халықаралық қайта құру және даму банкінен 46,7 млрд теңге несие тарту жоспарлануда.

Биыл қаңтарда Қазақстанда 504 ауыл спутниктік интернетке қосылғаны хабарланған болатын.

Қазақстандағы республикалық және облыстық жолдар 2027 жылы толық интернетпен қамтамасыз етіледі.