- Басты бет
- Жылжымайтын мүлік
- Алматыда 400 орындық студенттер жатақханасы салынады
Алматыда 400 орындық студенттер жатақханасы салынады
Жобаның жалпы құны – 750 млн теңге
«Алматы» әлеуметтік-кәсіпкерлік корпорациясының еншілес ұйымы – «Almaty Finance» ЖШС «BAZA 271» ЖШС-не жаңа студенттер жатақханасын салуға жеңілдетілген қаржыландыру ұсынды. Жобаны іске асыруға Almaty Business – 2025 бағдарламасы аясында жылдық 6%-бен, жеті жыл мерзімге 500 млн теңге бөлінді, деп хабарлайды Kapital.kz іскерлік ақпарат орталығы қала әкімдігінің баспасөз қызметіне сілтеме жасап.
«Жаңа жатақхананың құрылысы студенттерді заманауи әрі жайлы тұру жағдайымен қамтамасыз етіп, қаланың қолданыстағы инфрақұрылымына түсетін жүктемені азайтуға мүмкіндік береді. Құрылысты 2026 жылдың қарашасында аяқтау жоспарланып отыр. Сонымен қатар жобаны жүзеге асыру нәтижесінде 11 жаңа жұмыс орны ашылады», – деді Almaty Finance басқарма төрағасының орынбасары Эмиль Оспанов.
Жалпы ауданы 3 537,2 шаршы метр болатын жатақхана 400 орынға есептелген. Ғимарат төрт қабаттан және цокольдық деңгейден тұрады.
Жобаның жалпы құны – 750 млн теңге. Оның 250 млн теңгесі – инвестордың жеке қаражаты, ал қалған 500 млн теңгесі Almaty Finance ұсынған қарыз қаражаты.
Жоба ҚР Ғылым және жоғары білім министрлігінің «Қаржы орталығы» АҚ арқылы мемлекеттік субсидиялау тетігін пайдалана отырып іске асырылады. Субсидия көлемі әрбір тұратын студентке 230 айлық есептік көрсеткішті құрайды. Бір студенттің жатақханада тұру ақысы айына 45 мың теңге болады деп жоспарланып отыр.
Бұған дейін ғылым және жоғары білім министрі Саясат Нұрбек, Satbayev University ректоры Мейрам Бегентаев және Азия даму банкінің Қазақстандағы директоры Утсав Кумар студенттер жатақханасының құрылысын сүйемелдеу жөніндегі келісімге қол қойғаны хабарланған болатын.
Сондай-ақ Астанада колледж студенттеріне арналған 938 орындық жаңа жатақхана ашылды. Соңғы үш жылда елордада студенттерге арналған 20 жатақхана пайдалануға берілді.
Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.
Kapital.kz-ті оқыңыз
