• Басты бет
• Жылжымайтын мүлік
• Жетісу облысында 73 отбасы баспаналы болды

Жетісу облысында 73 отбасы баспаналы болды

Жыл соңына дейін тағы 1,4 мың кезекте тұрған азаматты баспанамен қамту жоспарланып отыр.

Жетісу облысында 73 отбасы жаңа баспанаға ие болды. Жетісу облысы әкімдігі баспасөз қызметінің мәліметінше, кезекте тұрған азаматтарға «Жастар-3» тұрғын үй алабынан үйлер берілді. Аталған шағын ауданда жалпы саны 790 үй салу жоспарланған, оның 393-і пайдалануға берілген.

«Жаңа қоныс иелерінің қатарында көпбалалы және толық емес отбасылар, жетім балалар мен ата-анасының қамқорлығынсыз қалған балалар, мүгедектігі бар балаларды тәрбиелеп отырған отбасылар, І және ІІ топтағы мүгедектігі бар азаматтар бар. Салынған әр үйдің жалпы аумағы 76 шаршы метрді құрайды. Әрқайсысында үш тұрғын бөлме, ас үй және жуыну бөлмесі қарастырылған. Айта кету керек, биылғы жылдың басынан бері әлеуметтік осал санаттағы 415 талдықорғандық отбасы баспанамен қамтамасыз етілді. Жаңа пәтерлер мен үйлер «Береке» коттедж қалашығында, «Жастар-3» тұрғын үй алабында, «Шығыс» және «Құлагер» шағын аудандарында, сондай-ақ Қ. Жалайыри даңғылы бойындағы тұрғын үйлерден берілді», – делінген әкімдік хабарламасында.

Сонымен қатар «Жастар-3» тұрғын үй алабының инфрақұрылымын дамыту жұмыстары жалғасып жатқаны нақтыланды. Шағын аудан өткен жылдан бері газбен қамтылған, қазір жол құрылысы жүргізіліп жатыр. Алдағы уақытта бірнеше жасыл аймақ, дене шынықтыру-сауықтыру кешені, 1200 орындық мектеп, фельдшерлік-акушерлік пункт және учаскелік полиция пунктін салу жоспарланған.

Өткен жылы Талдықорғанда 630-дан астам отбасы жеке баспанаға қол жеткізсе, биылғы жылдың соңына дейін тағы 1 400 кезекте тұрған азаматты тұрғын үймен қамтамасыз ету көзделіп отыр. Жалпы, Жетісу облысы құрылғаннан бері өңірде 1,4 млн шаршы метрден астам тұрғын үй пайдалануға берілді.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз