• Басты бет
• Тағайындаулар
• Ерлан Карин Президент Әкімшілігі басшысының бірінші орынбасары болып тағайындалды

Ерлан Карин Президент Әкімшілігі басшысының бірінші орынбасары болып тағайындалды

Ол 2022 жылдан бері мемлекеттік кеңесші қызметін атқарған

Мемлекет басшысының Жарлығымен Ерлан Тынымбайұлы Карин Қазақстан Республикасы Президенті Әкімшілігі басшысының бірінші орынбасары болып тағайындалды. Ол бұған дейін атқарған қызметінен босатылды, деп хабарлайды Ақорданың баспасөз қызметі.

Ерлан Тынымбайұлы Карин 1976 жылы Түркістан облысы Сайрам ауданындағы Ақсу ауылында дүниеге келген. 1996 жылы Қ. Жұбанов атындағы Ақтөбе университетін «Тарих және география» мамандығы бойынша тәмамдап, тарих және география пәндерінің мұғалімі біліктілігін алды. 1999 жылы әл-Фараби атындағы Қазақ ұлттық университетінің философия және саясаттану факультетінің аспирантурасын бітірген. Саяси ғылымдардың кандидаты.

Еңбек жолын 1996 жылы Ақтөбе қаласындағы №33 орта мектепте тарих және география пәндерінің мұғалімі болып бастады.

1998 жылғы наурыздан бастап Қазақстанның даму институтының Саяси зерттеулер орталығында қызмет атқарды, кейін Ресей және Қытай институты директорының орынбасары болды.

2000 жылғы шілдеден – Орталық Азия саяси зерттеулер агенттігінің директоры.

2002 жылдан – Қазақстан Республикасы Премьер-министрінің штаттан тыс кеңесшісі.

2003 жылдан – «Асар» республикалық партиясы төрағасының бірінші орынбасары, Халықаралық заманауи саясат институтының бас директоры.

2004 жылғы маусымнан – Терроризмге қарсы бағдарламалар орталығының жетекшісі.

2006 жылғы мамырдан – Маңғыстау облысы әкімінің саяси мәселелер жөніндегі кеңесшісі.

2008 жылғы ақпаннан – Қазақстан Республикасы Президенті Әкімшілігінің Ішкі саясат бөлімінің меңгерушісі.

2008 жылғы қарашадан – «Нұр Отан» партиясының стратегиялық даму жөніндегі хатшысы.

2013 жылғы желтоқсаннан – АҚШ-тың Вашингтон қаласындағы Америка университетінің шақырылған профессоры.

2014 жылғы қазаннан – Қазақстан Республикасы Президенті жанындағы Қазақстан стратегиялық зерттеулер институтының директоры.

2017 жылғы ақпаннан – «Қазақстан» РТРК» АҚ басқарма төрағасы.

2019 жылғы сәуір мен 2020 жылғы шілде аралығында – Қазақстан Республикасы Президентінің кеңесшісі.

2020 жылғы шілдеден – Қазақстан Республикасы президентінің көмекшісі.

2022 жылғы 5 қаңтарда Қазақстан Республикасының мемлекеттік хатшысы болып тағайындалды.

2022 жылғы 14 маусымнан 2026 жылғы 30 маусымға дейін Қазақстан Республикасының мемлекеттік кеңесшісі қызметін атқарды.

Ерлан Карин «Құрмет» (2010), II дәрежелі «Достық» (2019), II дәрежелі «Барыс» (2022) ордендерімен, сондай-ақ Өзбекстан Республикасының «Достық» орденімен (2024) марапатталған. Сонымен қатар Қазақстан Республикасы Президентінің Алғысымен (2020, 2021), Құрмет грамотасымен (2021), Мемлекеттік қызмет істері агенттігінің «Үздік мемлекеттік қызметші» төсбелгісімен (2022) және Ұлттық қауіпсіздік комитетінің «Ұлттық қауіпсіздікті қамтамасыз етуге қосқан үлесі үшін» медалімен (2019) наградталған.

Ол «Халифат сарбаздары: мифтер мен шындық» (2014), Джейкоб Зеннмен бірлесіп жазған «ДАИШ пен Әл-Каиданың арасында: Сирия соғысындағы Орталық Азия содырлары» (2017), «Балбалтас. Орхоннан Каспийге дейін» (2013), сондай-ақ Галина Ксенжикпен бірлесіп әзірлеген «XVII ғасыр – XX ғасырдың басындағы Қазақстан тарихына қатысты картографиялық материалдардың жинақталған каталогы» (2023) кітаптарының авторы.

Kapital.kz іскерлік ақпарат орталығының материалдарымен жұмыс істегенде тек 30% мәтінді ғана пайдалану, міндетті түрде көзге гиперсілтеме қою арқылы рұқсат етіледі. Толық материалды пайдалану үшін редакцияның рұқсатын алу қажет.

Kapital.kz-ті оқыңыз